Uhulumende uthi iqula lakhe likhangelelwe ukuhlangana lamankampani edlula amatshumi amahlanu ngoLwesibili embuthanweni wezamabhizimusi owe Kinshasa Outward Seller Mission elizweni leDemocratic Republic of Congo.
Iqula leli likhokhelwa ngumsekeli kamphathintambo wogatsha olubona ngobudlelwano lamanye amazwe uMnu. David Musabayana.
Embikweni owethulwe enkundleni yebulenjini eyeTwitter, ugatsha olubona ngobudlelwano lamanye amazwe luthi umbuthano lo uzakhuphula izinga lokuthengiselana leleDRC njalo ngeyinye yenjongo zikahulumende ezokufeza I Vision 2030, eyokuthi ilizwe libe selithuthukile kwezomnotho ngalowo mnyaka.
UMnu. Innocent Ndibali, okhokhela ibandla leEconomic Freedom Fighters-Zimbabwe, uthi leli linyathelo elihle ngoba umnotho weAfrica kumele uthuthukise amazwe alelozwekazi.
Kusenjalo, inkampani yeIH Securities ithi uphenyo esanda ukuluqhuba luveza ukuthi intengo yempahla ezitolo isiyehlile elizweni njalo isilingana leyeSouth Africa, ngenxa yokuphoqwa kwabantu ukusebenzisa idola leMelika kanye losizo oluvela kuhulumende olwama subsidies
Asizweni umbono kaMnu. Austin Nkomazana, obona ngeziphathelane lamabhizimusi kunhlanganiso yeBulawayo Progressive Residents Association.
Ukuze sizwe umbono wabaqhuba amabhizimusi asathuthukayo ngaloludaba, sixoxe loNkosazana Debra Mukasa, isiphathamandla senhlanganiso yeBulawayo Vendors and Traders Association.
Uhulumende uhlezi esithi ulenhlelo ezinengi ezokuthuthukisa umnotho welizwe, lanxa inengi lisithi akukabonakali ngoba impilo ilokhe ilukhuni.
