Kubhubhe abantu abahlanu ngeCovid-19 eZimbabwe ngoLwesibili njalo kwatholakala abedlula inkulungwane ezine, 4,031, belomkhuhlane lo.
Lokhu kukhuphule inani lasebebulewe yilolubhubhane laya ku4,718. Abaphethwe yilumkhuhlane sikhuluma nje bayi11,908, kutsho ugatsha lwezempilakahle.
Abahlatshwe ijekieni yakuqala yokwenqabela i-coronavirus bangu14,334 kuthi abahlatshwe eyesibili bangu18,587.
Ukukhuphuka kwenani labatholakala belomkhuhlane lo kuza ngesikhathi uhulumende esithi abantu abangahlatshwanga ijekiseni yeCovid-19 bazakwaliswa ukugada izimota ezithwala uzulu ezigoqela amakhombi lamabhasi.
Lokhu kwaziswe ngumphathintambo obona ngokwethulwa kwemibiko uNkosikazi Monica Mutswangwa izolo ngemva komhlangano wabaphathintambo.
Lanxa engatshongo ukuthi uzaqala ukusebenza nini lumlayo, uMutsvangwa uthe siyeza isikhathi.
Wengeza wathi uhulumende uzasungula indawo zokuhlabela uzulu lijekiseni ezilindweni zamabhasi ukwenzela labo abalokhe bengakahlatshwa abayabe befuna ukugada.
Isiphathamandla senhlanganiso yeBulawayo Progressive Residents Association uMnu Thembelani Dube utshele iStudio 7 ukuthi lanxa kulungile ukukhuthaza abantu ukuthi bahlatshwe, ukubavimba ukugada amabhasi lemitshova yikwephula amalungelo abo.
