Uhulumende uthi usezagumula izisebenzi zikaloliwe kulandela ukungahambi kuhle komsebenzi wokuthwala uzulu lempahla ngezitimela.
Izisebenzi zalinkampani sezilesikhathi esedlula umnyaka owodwa lezinyanga ezimbalwa zingaholi.
Ezinye izisebenzi zikaloliwe sezike zafaka phansi izikhali zikhonona ngokungatholi iholo ezinye ngezike zayahlala phandle kwamahofisi alinkampani.
Umphathintambo wezokuthwala, uMnu. Joram Gumbo utshele intathelizindaba ukuthi uloliwe ulezisebenzi ezedlula inkulungwane ezinhlanu, 5 700 osekumele ziphungulwe ngenkulungwane ezintathu, 3 000.
Kodwa umkhokheli wenhlanganiso yezisebenzi, iZimbabwe Amalgamated Railwayman’s Union, uMnu. Kamurai Moyo utshele iStudio Seven ukuthi kabatshelwanga ngokugunyulwa kwezisebenzi lokhu.
"Lathi sikubone emaphepheni ... sinje njengezisebenzi asikakuboni, asikakuzwa asikakutshelwa lathi asikwazi. Kodwa nxa befuna ukuxotsha abantu kumele babhadale izisebenzi ama package kodwa bazayithatha ngaphi imali yakhona," kutsho uMoyo.
Uthi umthetho uthi nxa umuntu emele axotshwe kumele asuke ephethe imali yokumvalelisa.
