Intengo yempahla iqhubeka iqansa mihla ngemihla lanxa uhulumende esithi umnotho welizwe ususiba nganeno.
Umphathintambo wezemibiko, uNkosikazi Monica Mutsvangwa, ngoLwesibili utshele intathelizindaba ngemva komhlangano wedale leCabinet ukuthi uhulumende uphakathi kokusungula amacebo okwenqabela amaxuku abantu abahuquluza inotho, ama cartel ngeSilungu, ukuthi aqhubeke ebhidliza umnotho welizwe.
Amarcatel la, yiwo acatshangelwa ukuthi asebenzisa ubuhlobo bawo leziphathamandla zikahulumende ukuthi ahuquluze inotho yelizwe.
UNkosikazi Mutsvangwa uthe uhulumende ukhathazeke kakhulu ngokukhuphuka kwentengo yempahla ezitolo.
Kodwa uthe ulethemba lokuthi umthetho ongakabunjwa othiwa yiTripartite Negotiating Forum Bill, ulamacebo akhangelelwe ukuncada ukukhuphuka kwentengo mahlayana.
Usomabhizimusi wako Bulawayo, uMnu. Albert Mhlanga, uthi intengo yempahla ezitolo izaqhubeka iqansa ngoba sokusobala ukuthi imizamo kahulumende iyehlula.
Isikhulumeli senhlanganiso yabathengi, eye Consumer Council of Zimbabwe esigabeni se Matabeleland, uMnu. Comfort Muchekeza, uthi intengo yempahla ikhanya isiba ngcono emaphandleni lanxa yikho eyandise ukukhuphuka khona.
NgoMvulo inhlanganiso yabachola amabele, eye Grain Millers’ Association yakhweza intengo yempuphu le rice.
NgoLwesihlanu inkampani elungisa itshukela eye Tongaat Hullet Zimbabwe ithe ikhweze intengo yetshukela. Sikhulume nje enye intengo yenye impahla layo ikhwela mihlan ngemihla.