Usibalukhulu webhanga elikhulu eleReserve Bank uMnu. John Mangudya ubikwa esithi ibhanga leli lizancedisa ukuthuthukisa inhlelo zamanzi elizweni ukwenzela ukuthi kuguqulwe inhlelo zokulima njalo amanzi atholakale lula.
Lokhu kuphume emhlanganweni omkhulu oweWater Infrastructure Investment Conference eHarare, olenjongo yokuqoqa imali uthuthukise inhlelo zamanzi ezikhangelelwe ukulethela ilizwe amanzi amanengi.
Evula lumhlangano ngokusemthethweni ngoMvulo, umongameli Mnangagwa utshele osomabhizimusi kulumhlangano ukuthi ukuswelakala kwamanzi kwenqabela ukuthuthuka komnotho welizwe, ngakho uhulumende wakhe uzimisele ukusebenza gadalala kulezinhlelo.
Ukuhlaziya isimo samanzi elizweni, kanye lenhlelo zikahulumende, sixoxe loMnu. Sam Siphepha Nkomo, owake waba ngumpathintambo obona ngenhlelo zamanzi kuhulumende womanyano.
UMnu. Nkomo uthi kungathatha isikhathi eside ukuthi kulungisiswe loludaba ngoba inhlelo zamanzi ezinengi, ezinye azisungulayo engumphathintambo kahulumende, zamiswa ngenxa yokuswelakala kwemali.