Uhulumende uthi usengezelele izisebenzi zakhe iholo, okugoqela ababalisi, bona athi sebezahola iZ$18,237. Kodwa ababalisi bathi inlutshwana limali.
Abafundi abavule izikolo ngoMvulo abagoqela oGrade 1 kusiya kuGrade 5 kanye laboForm 1 laboForm 2 babikwa betshona bezulazula nje ezikolo njengabanye abafundi abavule kuqala ngoba ababalisi belokhe bephakathi kokukhalala umsebenzi.
Kwezinye izikolo abafundi babikwa batshelwe ukuthi bazafunda ngelanga elilodwa kuphela ngeviki.
Izikolo zavalwa ngoMbimbitho ngenxa yegciwane leCoronavirus zaseziqala ukuvulwa ngamahlandla atshiyeneyo ngoMpandula kuqala ngabafundi abaloba imihloliso lonyaka abagoqela oGrade 7, oForm 4 laboForm 6.
Balandelwe ngoGrade 6, oForm 5 kanye laboForm 3 ngenyanga edluleyo kuhlandla lesibili. NgoMvulo bekulihlandla lokucina.
Kodwa abafundi abavule kuhlandla leli bafike bathola abavula kuqala besemahlangeni kungelababalisi ngoba bekhalale umsebenzi besithi uhulumende kumele engeze iholo labo lilingane leUS$520.
Okwakathesi bahola imali edlula kancane iUS$120 kuphela.
Unobhala jikelele wenhlanganiso yeZimbabwe Teachers’ Association (ZIMTA), uMnu Tapson Nganunu Sibanda utshele iStudio 7 ukuthi abablisi ababuyeli emuva ngodaba lokukhalala umsebenzi.