Uhulumende sevumele inhlanganiso ezizimeleyo ukuthi ziyezibonela okwenzakalayo emigodini yamadayimana eMarange.
Lokhu ngokwakuqala selokhu ukwenjiwa kwamadayimana kwaqalayo eminyakeni esanda kwedlula.
Esikhathini sonke uhulumende ubesala ukuthi inhloko kahulumende uMnu Morgan Tsvangirai lamalunga edale lephalamende bethekelele limigodi. UTsvangirai uze wavunyelwa kumaviki ambalwa edluleyo.
Inhlanganiso ezizimeleyo lezi zizakhokhelwa yiziphathamandla zikahulumende ngoLwesithathu zibhoda ngalimigodi zibona ukuthi umsebenzi uhanjiswa ngendlela efunakala yiKimberly Process na.
Inhlanganiso lezi zibalisa iZimbabwe Lawyers for Human Rights, Crisis in Zimbabwe Coalition, Nango, Centre for Research and Development leChiyadzwa Community Development Trust.
Kube lokukhonona okukhulu kuzulu weMarange labalwela amalungelo oluntu eminyakeni edluleyo bekhala ngokuthi amasotsha alinda limigodi ebehlukuluza abantu ababecatshangelwa ukuba bebegebha amadayimana okungekho emthethweni.
Abanye babikwa belahlekelwe yimpilo, okwenze amazwe afana leMelika akhuthaza abakwamanye amazwe ukuthi bengawathengi lawamadayimana.
