Uhulumende weBotswana sexwayise abalimi ukuthi bengahlukulizi izisebenzi zabo zemapulazini njalo baziholise imali ehambelana laleyo esemthethweni, hatshi ephansi.
Zinengi izizalwane Zimbabwe ezisebenza emapulazini eBotswana njalo ezinengi zazo kaziphathwa kuhle ngabaqatshi.
Umphathintambo obona ngezezisebenzi kulelolizwe, uMnu Edwin Batshu utshele abalimi ukuthi kumele balandele umthetho ekuhlawuleni lekuphatheni izisebenzi.
UBatshu uthole umbiko ovele kukomidi yedale lephalamende ebikhangela izikhalazo zezisebenzi zemapulazini obeka abaninipulazi umlandu wokuphatha izisebenzi ngesihluku esethusayo kanye lokungaziholisi imali ebenza benelise ukunakekela imuli kwezinye izikhathi zingaholiswa.
Uthe kuqakathekile ukuthi abaqatshi belandela umthetho njalo bengahlukumezi abelusi kanye lezinye izisebenzi ikakhulu bekhangele ukuthi badabuka kuphi.
Udaba olubuhlungu olubuya masinya engqondweni ngolukaMnu Gift Ncube, yena owadutshulwa ngesikhathi ebuza umqatshi ngeholo lakhe ngemva kokugamula emasimini.
UNcube usanda kulahlekelwa ludaba lolu emthethwandaba waphezulu lapho umqatshi wakhe atholakale engelacala.
Leyi yimpilo eyabanengi abeZimbabwe abasemapulazini, umnunzana Aaron Dube esithi kwesinye isikhathi bahlala inyanga lezinyanga benga tholi iholo…
"Kunzima kithi emapulazini. Uyenelisa ukuhlala isikhathi eside ungaholi kodwa umsebenzi wakhona umnengi."
Kodwa ngemva kwesithembiso sikahulumende ukuthi kumele bahlawulwe imali esemthethweni umnunzana Mthelisi Sibanda uthi kuyathembisa…
"Kungabalinyathela elihle uthi kulandelwe iholo elisemthethweni ukuthi abantu bengancidezelwa. Kuqakathekile ukuthi uhulumende angenele ngoba abanye baphiwa imali ezingange P100 ngenyanga , okuyimali encane."
Unkosazana Sitheni Ndlovu uthi isimo sabeZimbabwe abasemapulazini eBotswana sidalwa yikuthi bazithola bedubekile bengala kukhetha umsebenzi.
"AbeZimbabwe bazithola behola imali ephansi ngenxa yesimo sabo lapho abamukela noma yiwuphi umsebenzi."
Kubikwa abanye abaqhatshi behlawula izesebenzi ikhulu lamapula kuphela kodwa uhulumende esithi okulutshwana abangakuthola okusemthethweni ngamakhulu ayisithupha.
UBatshu uthi uhulumende uzabona ukuthi lokhu kuyalandelwa, ecebisa izisebenzi ukuthi zibike kugatsha lwakhe labo abangalandeli imithetho kahulumende.
Kwezinye izigaba, izisebenzi zibikwa ziphiwa ukudla kanye lokudakayo njengenhlawulo.
