amalinks wokungena

Breaking News

Uhulumende Wehluleka Ukukhulumisana Lezisebenzi Ngeholo


Inhlanganiso yezisebenzi zikahulumende ekhulumisana lohulumende ngezeholo eye Apex Council ithi yehlulekile ukuhlangana lomphathintambo wezisebenzi ngokukhuphula iholo lalonyaka.

UMnu. Sifiso Ndlovu oku Apex Council njalo ongumqondisi we Zimbabwe Teachers Association uthi umphathintambo wezisebenzi uNkosikazi Lucia Matibenga wehlulekile ukubuya emhlanganweni ovunyelwane ngeviki ephelileyo lezisebenzi.

UNdlovu uthi loba uNkosikazi Matibenga ethumeze ilizwi lokuthi uzahlangana le Apex Council ngoLwesihlanu, izisebenzi sezilungisela ukukhalala umsebenzi okwelanga elilodwa ngoLwesine njengokwethembisa ezikwenze ngeviki ephelileyo.

UNkosikazi Matibenga walile ukukhuluma ngodaba lolu. Izisebenzi zifuna iholo lesisebenzi esihola imali ephansi likhuphuke lisuka kumakhulu edlula amabili amadollar liyefika kumakhulu edlula amahlanu amadollar ngenyanga.

UNdlovu uthi izisebenzi seziqoqana ukwenzela ukuthi zikhalale umsebenzi ngoLwesine.

XS
SM
MD
LG