Uhulumende ngoLwesihlanu uqhelise ngamaviki amabili isikhathi sokuvalwa kwelizwe emizameni yokwenqabela ukumemetheka komkhuhlane weCovid-19.
Umphathintambo wezempilakahle uMnu Constantino Chiwenga wazise ukuthi uhulumende ubone kufanele ukuthi ilizwe liqhubeke livaliwe kuze kuyefika mhlaka 15 ngenyanga ezayo ngoba umkhuhlane lo ulokhe umemetheka.
Lanxa bebanengi abantu ababanjwa iCoronavirus lababulawa yilumkhuhlane kulezinsuku, uChiwenga uthe ukuvalwa kwelizwe okuqale mhlaka 5 kulinyanya sokwenze umumo waba nganeno.
Wengeze wathi kulengozi yokuthi kungaba sokulomkhakha weCovid-19 omutsha elizweni.
Ngokunjalo, uthe ingcwethi zikahulumende ziphakathi kokuphenya loludaba.
Inani lasebebulewe ngumkhuhlane lo eZimbabwe lona likhwele laya kunkulungwane elekhulu lamatshumi ayisithupha, 1,160, izolo ngemva kokubhubha kwabantu abangamatshumi phose amane, 38.
Ababanjwe umkhuhlane lo izolo njalo bangamakhulu amathathu alamatshumi amane lambili, 342.
Lokhu kukhuphule inani lasebefunyenwe beleCoronavirus kulelilizwe laya kunkulungwane ezedlula amatshumi amathathu, 32,646.
Isiphathamandla senhlanganiso yeCitizens Covid-19 Monitor uMnu Effie Dlela Ncube utshele iStudio 7 ukuthi ukuqheliswa kwe-lockdown yinto ebivele ikhangelelwe.
