EleMelika lithi eleZimbabwe ngelinye lamazwe ephule amalungelo oluntu kakhulu nyakenye.
Lokhu kuphume kugwalo olwethulwe ngunobhala wogatsha olubona ngobudlelwano beMelika lamanye amazwe olweU.S. State Department uMnu Antony Blinken izolo.
UMnu Blinken uthi uhulumende kaMongameli Emmerson Mnangagwa uhlukuluze kakhulu abenhlanganiso ezizimeleyo, abalwela amalungelo ezisebenzi, abalwisa inkohlakalo, izitabane kanye labamabandla aphikisayo abafana labeMDC Alliance uNkosazana Joana Mamombe, uCecilia Chimbiri loNetsai Mavora, bona abake bathunjwa ngabantu abanakanelwa ukuthi ngabacuphi babahlukuluza.
Uthi njalo uhulumende uhlukuluze intathelizindaba ezifana loFrenk Chikowore yena oke wabotshwa kanye lomhleli wenkundla yeZimLive uMduduzi Mathuthu yena ongenelwe ngabantu endlini yakhe nyakenye kuze kuthunjwe umtshana wakhe uTawanda Muchehiwa.
Amanye amazwe asolwa yiMelika ngokwephula amalungelo kugwalo lwe2020 Human Rights Report agoqela eleChina, Russia, leleVenezuela.
IMelika ithi njalo kuyadanisa ukuthi amapholisa lamasotsha eZimbabwe etheswa icala lokubulala abantu ngo2018 alokhe engakabotshwa.
Ilunga leMDC Alliance uMnu Edwin Ndlovu uthi bavumelana lamazwi eMelika.
Khepha ilunga leZanu PF uMnu Believe Gaule uthi akulakwephulwa kwamalungelo okwenzakalayo eZimbabwe.