Inhloko kahulumende uMnu. Morgan Tsvangirai uthi amabandla abusayo eZimbabwe aseyehlulekile ukusebenza ndawonye njengoba kungela nguquko yemithetho yonke eyabunjwa libandla le Zanu PF yokuncindezela abantu makhaza.
Esethula umbiko wakhe ngoLwesine wokugqiba umnyaka ka 2011 edale lephalamende, uTsvangirai uthe imthetho elokhe ingakaguqulwa nguhulumende womanyano enjenge Electoral Act eyenza ukuthi kungabi lokukhululeka ngesikhathi sokhetho, iPublic Order and Security Act kanye le Access to Information and Protection of Privacy Act eyabunjelwa ukukhahlameza uzulu.
UTsvangirai uthe kulemithetho engamatshumi amabili lane eqakathekileyo okwakumele ibunjwe nguhulumende womanyano kodwa idale le phalamende lenelise ukucubungula imthetho eyisikhombisa kuphela selokhe kwabunjwa uhulumende womanyano.
Uthe lokhu kutsho ukuthi kulokudonselana okunzima kuhulumende osekwenze lokuthi kungabunjwa umthetho wokulwela amalungelo oluntu. UTsvangirai uphinde wathi zilutshwane inhlelo zikazulu ezenziwe nguhulumende womanyano loba nje umnotho welizwe uthuthuke kancane.
Kodwa-ke inhloko kahulumende iphinde yasola uhlelo lokwabelana amashares amankampani emazweni olwe Indigenization esithi kalusoze luphandele uzulu imsebenzi.
UTsvangirai uthe kuleziphathamandla zika hulumende ezikubandla le ZANU PF ezingafuni ukusebenza laye.
Uthe akulakhetho oluzakweziwa ngesiphangiphangi eZimbabwe kungakaguqulwa imthetho encindezela uzulu.
UMnu. Discent Collins Bajila ongunobhala jikelele wabasakhulayo kubandla le Movement for Democratic Change elikhokhelwa nguMnu. Welshman Ncube uthe kungeke kwenzakale ukuthi amabandla akuhulumande womanyano adonse ndawonye ngenxa yokuthi “kufana lokulima ngebhiza libotshwe ledonki”.
UMnu. Roderick Fayayo oyingcwethi kwezombusazwe njalo ongumqondisi we Bulawayo Progressive Residents Association ugcizelele esithi uhulumende womanyano uhlutshwa yikuthi amabandla abusayo ayenza engani asemfeni okulwiwa khona.
