amalinks wokungena

Breaking News

Woza Friday: Liviki uJoseph Njanji Uxoxa loJeys Marabini


Jeys Marabini
Ku Woza Friday kulimpelaviki intathelizindaba yethu uJoseph Njanji usethulela ingxoxo ayenze lomculi wengoma zohlobo lwe Afro – jazz u Jeys Marabini yena osanda kukhipha idlalade lakhe elitsha eliphansi kwesihloko esithi “Isilo”.

Leli lidlalade lika Jeys elesikhombisa njalo lumhlabeleli owethiwa igama elokuzalwa elithi Majahawodwa Ndlovu uthi lilomehluko omkhulu kulemisebenzi yakhe aseke wayiphakela uzulu eminyakeni edluleyo.

Lelidlalade lilengoma ezilitshumi lanye njalo lezi ngezigoqela ethi Amath´ethole, Ndwandwe, Silo, Khumbul´ekhaya, Usiko, Woz´ubone, Qinisela, Ngiyohlala Nginawe, Siyajayiva, Follow Me kanye lethi Ayikh´indawo.

Umculi uthi idlalade lakhe leli elithi iSilo licindezelwe elizweni le Zimbabwe kodwa laselisiya lolongwa elizweni lase Austria okuyikho lapho okuhlala khona uproducer wakhe uDumisani Ramadu njalo ngeviki ezayo yena leqembu lakhe bazabhekisa amabombo phetsheya kolwandle lisiyakhona eAustria lapho eliyaphatheka khona kumkhosi obizwa ngegama elokuthi Roots Music from Southern Africa okhangelelwe ukuqala mhla zingamatshumi amabili lanye kuyonale inyanga.

UJeys usebenza leqembu le Kozekulunge njalo elizweni le Austria bazatshaya ndawonye leqembu leNsingizi - lona eladuma kwele Zimbabwe ngengoma ethiwa Sugar Daddy ngeminyaka eyadlulayo – kanye leqembu elibunjwa ngabaculi besifazane kuphela elaziwa ngokuthi Nobuntu.

Lumculi uthi akasoze ahlale okwesikhathi eside khonale eAustria kuhambo lwakhe lolu kodwa ngomnyaka ozayo yilapho azahamba alobe okwesikhathi eside ephetsheya kolwandle lapho azabe ephakulela abakhonale imisebenzi yakhe.

Amanye amadlalade kaJeys awakhiphe eminyakeni edluleyo ngagoqela elithiwa Emarabini okuyilapho okwavela khona igama abizwa ngalo elokuthi Marabini, Lelo lalandelwa ngelithi Thuthukani Ngothando, kweza elithi Sounds of today and tomorrow lona elalandelwa ngelithi One Time, kwalandela elithi Izenzo ikanti ikanti elilandelwe yileli elitsha ngelithi Jeys at 40.

Idlalade leli elithi Isilo liqukethe ingoma ezikhuluma ngokutshiyeneyo okugoqela ezothando, ezamasiko kanye lokunye nje okumayelana lempilo kazulu. Nango ephuma enkundleni ngengoma ehambelana losuku lwanamhlanje kunje kuyimpelaviki ethi Siyajaiva.

please wait

No media source currently available

0:00 0:08:23 0:00
Lapho esitholakala khona
XS
SM
MD
LG