Iqembu le Highlanders lizadibana leqembu eliphethe isicoco se Castle Lager Premier Soccer League ele FC Platinum NgoMgqibelo, enkundleni ye Mandava njalo umqeqetshi walo uHendrik Pieter de Jongh utshele intathelizindaba zemidlalo ngoLwesihlanu ekuseni ukuba ukhangelele ukuba lumdlalo ubenzima kakhulu njengoba iqembu le FC Platinum lifuna ukuvikela isicoco seligi.
UDe Jongh uqhubekele phambili wathi yonke imidlalo iqembu lakhe elizayidlala ayisoze ibe lula kodwa yena okumthokozisayo yikuba lokhu akuqhatshelwayo sewakwenelisa.
"Kungangithokozisa ukuqeda imidlalo yalonyaka sihlezi endaweni yetshumi lambili engalaneni yemiklomelo ngoba mina iqiniso yikuba ngaqhatshelwa ukuba ngihlenge Iqembu ekugunyulweni kusigaba saphezulu. Okunye esenelise ukukwenza njengeqembu yikuba abalandeli babuye ngobunengi enkundleni njalo lokhu sikwenelise ngokudlala ibhola elijabulisa izibukeli," kutsho ude Jongh.
Iqembu le Highlanders lizadlala leqembu le Manica Diamonds ngemva komdlalo walo lele FC Platinum kuthi kumidlalo yalo eyokucina lizadibana lele Bulawayo Chiefs kanye lele Chapungu.
Kusenjalo iqembu le Highlanders lizabe lingela umgadli walo elimthembileyo uPrince Dube yena oyingxenye yeqembu lesizwe elaziwa kakhulu ngegama elithi Warriors lona elizadibana lele Botswana namhla ntambama emdlalweni womncintiswano we 2021 Africa Cup of Nations.
Iqembu leli lizakwala lilokhe lindawonye ngemva komdlalo wanamhla ntambama lilungiselela ukuyadlala lele Zambia ngoLwesibili oluzayo kumncintiswano ofanayo.
Iqembu lesine Lalo elikusibaya sika Group H ngele Algeria lona elibhaxabule ele Zambia nge 5 ka nya emdlalweni odlalwe namhla.
Kweminye imidlalo yesigaba we Castle Lager Premier Soccer League ekhona kulimpelaviki iqembu le TelOne lizemukela ele Triangle United ngase Ascot, iqembu le Chicken Inn lizadibana lele Hwange ngase Luveve, iqembu le Herentals lizadibana lele Mushowani Stars ngase National Sport Stadium, kuthi iqembu le Ngezi Platinum Stars lizadlala lele Chapungu ngase Baobab.
Yonke limidlalo izadlalwa ngoMgqibelo kuthi ngeSonto iqembu Manica Diamonds lizemukela ele Bulawayo Chiefs ngase Vengere, iqembu le Dynamos lizadlala lele Black Rhinos ngase Rufaro, iqembu le Yadah lizangqikilana lele CAPS United ngase National Sport Stadium kuthi Iqembu le ZPC Kariba lizadlala lele Harare City ngase Nyamhunga.
