Ukhansila weCowdray Park koBulawayo uMnu. Kidwell Mujuru uthi zinengi inhlelo zentuthuko aziqhubayo ewadini yakhe selokhe wanqobayo kukhetho olwedluleyo, waba nguye yedwa owebandla leZANU PF phakathi kwabanye bakhe abangamatshum amabili lasitshiyagalombili kumanisipala walelodolobho.
Uthi inhlelo lezi zqhutshwa kusetshenziswa imali yesikhwama sikahulumende eseDevolution Funds.
Lokhu kulandela ingxabangxoza eqhamuke ewadini yakhe ngoLwesine kwaze kwangenela amapholisa ngemva kokuba izakhamizi zimsole ngokuthi uncedise inkampani evela eHarare, eyakha ikilinika endaweni eyaziwa ngokuthi kuse eMpompini njalo iqhatshe izisebenzi ezingaveli koBulawayo kumbe eMatabeleland.
Ukhansila Mujuru uvumile ukuthi nguye oqhatsha izisebenzi zewadini yakhe ukuze zisebenze kunkampani ezithola ama tender ewadini yakhe njalo udaba lolu luzalulungisa, kukanti phakathi kwezakhamizi ebezikhonona uhle waqhatsha ezinye zazo. Uthi inkampani le ayilandelanga iziqondiso zakhe.
Kodwa uMnu. Moffat Phiri, obona ngokuqhutshwa kwenhlelo kunhlanganiso elwela ilungelo loluntu eye Mthwakazi Residents Association, uthi okukhulunywa nguMnu. Mujuru akusiqiniso.
Uphinde wamsola ngokuqhuba inhlelo zamakilinika kungakalungiswa ezengcekeza ye sewage engena ezindlini zabahlali beCowdray Park.
UMnu. Mujuru uthi uzalulungisa loludaba kungatholakala imali eneleyo. Uthi kuleyinye njalo inkampani yeHarare esebenza eduzane lesikolo seTategulu ewadini yakhe njalo wayixwayisa ngokuthi kuqhatshwe abantu besigabeni.
UMnu. Phiri uthi uhlupho lolu lubhahile lakwezinye indawo njalo inhlanganiso yakhe yadibana lalo eduzane leNgozi Mine, lapho umantshingelane owahle wabaphendula ngokuthi kezwa ulimi lwabo bezama ukukhulumisana leziphathamandla zalinkampani.
UMnu. Zibusiso Mhabahaba Mkhwananzi uthi izakhamizi zeCowdray Park zibamemile njengebandla leMthwakazi Republic Party ukuthi bengenele kuloludaba, njalo usola uMnu. Mujuru kanye lokuphiwa kwenkampani yeHarare i-tender koBulawayo. Uthi uMnu. Mujuru ummeli izakhamizi zeHarare hatshi ezakoBulawayo.
UMnu. Mujuru uthi inkampani esebenza eCowdray Park izaqhubeka isebenza ngoba isivele yathola imvumo ye tender.
Silokhe sikweziphathelane lentuthuko, ummeli weLupane East edale lephalamende, ekubandla leZANU PF, uMnu. Mbongeni Dube, usetshayele umongameli Emmerson Mnangagwa ihlombe ngathi yikuqhutshwa kwenhlelo esigabeni sakhe ngokutshetsha selokhe wangena embusweni.
Unikeze umzekeliso ngesibhedlela seLupane Hospital, ikilinika eyakhiwa esigabeni sakhe, kanye lenhlelo zokuthelezela.
Uthi akusiqiniso ukuthi inyathelo leli ngelokukhankasela ukhetho njalo inhlelo lezi azisoze ziphutshe.
Kodwa uMnu. George Mkhwananzi, ingcwethi ecubungula ezombusazwe uthi kusobala ukuthi ibandla leZANU PF likhankasela amavoti njengenhlalayenza ngoba inhlelo ezinengi azigqitshwa.