Uhulumende weZimbabwe usebophe waphinda wakhulula uMnu. Kwasi Adu-Amankwah, unobhala jikelele wenhlanganiso yeAfrican Regional Organization of the International Trade Union Confederation (ITUC-Africa).
UAdu-Amankwah ukhangelelwe ukuthi uzakwenza imihlangano embalwa leziphathamandla zenhlanganiso yezisebenzi eyeZimbabwe Congress of Trade Unions lezikahulumende.
Ubethethwe ngamapholisa ensitha ewoteleni yakhe bahamba laye emagcekeni endizamtshina eRobert Gabriel Mugabe International Airport. Bekukhangelelwe ukuthi uzabiselwa eGhana lapho abaduka khona.UMnu. Japhet Moyo, unobhala jikelele weZCTU, uthi uAdu-Amankwah ufisa ukudingisisa ukuthi kwahamba njani ngesikhathi abantu betshengisela emigwaqweni besola isimo esibi somnotho eZimbabwe.
Uthi akuqali lokhu okwenzakale kuAmankwah, esithi zikhona ezinye izethekeli zeZCTU uhulumende azibuyisela muva.
“OAlice Siyame, abe COSATU iCoalition of Black Trade Unions abe America ngabanye abaku list yabantu abathathwa emawoteleni abo badiphothwa bengela cala. Ukubuya nje ukuzonika isolidarity le ZCTU. So, sizwa ubuhlungu ngalokho okwanzakale kuKwasi lamuhla nje ekuseni. Sesingazama lathi ngendlela zonke ukuthi omunye wethu uyaphumelela ukuthi azehlangana lathi.”
Ngakolunye udaba oluhambelana lalolu, amapholisa akhulule abesifazana ababili abenza imidlalo yokuzilibazisa ngokuhlekisa uzulu ama comedies ngaphansi kwenkampani yeBus Stop TV, uNkosazana Samantha Kureya, owaziwa ngelokuthi Gonyeti, loNkosazana Sharon Chideu owaziwa ngelokuthi Magirazi.
Ababili laba bebethethwe ngamapholisa ohlangothi lweLaw and Order ngaphansi kweZimbabwe Republic Police.
Obemele ababili laba nguMnu. Lizwe Jamela. Bahlawuliswe $20 umuntu munye ngamunye kulandela ukwetheswa kwabo icala lokugqoka okungekho emthethweni izembatho zamapholisa.