UKutsanzira uqale ukudlala esigabeni saphezulu ngomnyaka ka 2009 edlalela iqembu le Highlanders ngemva kokuba ebonwe ngumqeqetshi uMadinda Ndlovu edlalela iqembu le New West elalikusigaba sika Division Two.
Useke wadlalela njalo leqembu le CAPS United njalo uthi wenelise ukudlala kusigaba saphezulu okweminyaka eyedlula elitshumi ngoba esebenza kanzima.
“Akungeke kube lula nje uvuke sekuthiwa udlalela iqembu le Highlanders. Amaqembju afana lele Highlanders kanye lele CAPS United alabalandeli abanengi njalo babuya ngobunengi bezobukela. Kuyafana lakhathesi ngidlalela iqembu le FC Platinum elidlala kumncintiswano we CAF Champions League njalo inguqu yakhona itsheyene lale esiyidlala kwelakithi ngoba lapho kulamaqembu ahlala ekhona kulowomncintiswano. Kuqakathekile ukutshiyana lezinto ezingakuphazamisa njalo kumele ufunde kubadlali abalodumo abafana labo Cristiano Ronaldo labo Messi. Ngingaka nginje sengifikise iminyaka engamatshumi amathathu lambili kodwa ngilokhu ngisafunda,” kutsho uKutsanzira.
UKutsanzira uqhubekele phambili wakhuthaza abasakhulayo ukuba kuqakathekile ukusebenza nzima ngoba ithalenta lodwa alenelanga kodwa kumele umuntu abe lephupho elokuba ngumdlali wezinga laphezulu aphinde njalo asebenze gadalala.
“Ithalenta lodwa kalingeke likuse ndawo kodwa kumele usebenze nzima lawe ukhwabithe ukuba ngumdlali olodumo njengabo Cristiano. Thina sakhula sibukela oTshisa (Johannes Ngodzo), oMaro (Ronald Sibanda), oRichard Choruma, oTapuwa Kapini labanye. Sasihamba eBarbourfields sifike sikhalele ukungena mahala ebholeni singakwazi ukuthi ngelinye ilanga yithi esiyabe sesidlala phakathi. Ayikho lula indlela yakhona,” kutsho uKutsanzira.
Umdlalo wenguqu umile kulezinsuku elizweni lase Zimbabwe ngenxa yomkhuhlane we Covid 19 njalo uKutsanzira uthi phezu kokulandela imilayo yokuzivikela kumele abantu beqine ngomthandazo.
“Kumele sibone ukuthi siyathandaza ukuze into leyi iphele njalo kumele sihlale ezindlini sihlamba izandla zethu ukuze sibone ukuthi siyazivikela kulumkhuhlane. Kumele sifake umlimu phambili ukuze siwunqobe. Akumelanga siqambelane amanga ngoba yinto ekhona sibili,” kutsho uKutsanzira.
UKutsanzira uthi isifiso sakhe ngesokuthi eqale ezokuba ngumqeqetshi esasengumdlali ukuze nxa esethatha umhlala phansi abe ngumqeqetshi laye akhulise abadlali bakusasa.
Imidlalo ye Castle Lager Premier Soccer League bekumele iqale ngenyanga kaMbimbitho kodwa idluliselwe phambili ngemva kokuqhamuka komkhuhlane we Covid 19.
Akukacaci ukuba imidlalo le isizaqala nini njengoba umdlalo wenguqu ungomunye wemidlalo okuthiwa nguhulumende ilengozi eyokuba abadlali bengathelelana igciwane lo Corona.