Umkhokheli weZimbabwe Human Rights NGO Forum uMnu Musa Kika umangalele uMnu Luke Malaba edale leHigh Court kudaba afuna luthethwe ngesiphangiphangi esithi uMalaba uqhubeka esiya emsebenzini lanxa nje linkundla yanquma ukuthi isikhathi sakhe sokuba ngomahluli omkhulu sesedlula njalo sokumele aye kumpentsheni.
UKika uthi uMalaba kumele abotshelwe ukweyisa umthethwandaba njalo etheswe isigwebo sokupika okwenyanga eziyisithupha.
Kodwa uthi leso sigwebo singabekwa eceleni nxa engahle atshiye umsebenzi njengokutsho kweHigh Court.
Idale leli lanquma ukuthi ukwengezwa kwesikhathi sokusebenza kukaMalaba nguMongameli Emmerson Mnangagwa kwakungekho emthethweni.
Ugatsha lweJudicial Service Commisson lwalandela ngokukhetha uJustice Elizabeth Gwaunza ukuthi aphathe isikhundla sikamahluli omkhulu.
Kodwa kuvele kuliviki ukuthi uMalaba ulokhe esiya emsebenzini ngoba uhulumende uthi waphikisa ukususwa kwakhe esihlalweni. Akukacaci ukuthi isicelo sikaKika sizahluzwa nini.
UMni Kika ungomunye wabomamangala ababangela ukuthi uMalaba asuswe esihlalweni.