Abesifazana bethesa abokulondolozwa komthetho umlandu wokubahlukuluza endaweni yokubavikela engozini zokudlwengulwa. Abalondoloza umthetho bona bathi baqhuba lumsebenzi ngenjongo yokuvikela abesifazane ukuze bangaze bazithola sebesengozini yokudlwengulwa.
Abesifazana abanengi bakhala ngokuthi ubaba nxa ethe wabhekana lengozi yokuhlukuluzwa ubalekela kwabezomthetho. Kodwa owesifazane uyesaba ukwenza okufanayo ngoba ezahlukuluzwa kuthiwa nguye obekudinga lokho kuhlukumezwa.
Lo kubikwa kuyiwona mumo osukhona eZimbabwe ikakhulu esigodlweni eHarare lapho abesifazane bahlukuluzwa kokuphela ngamapholisa. Umlandu abawetheswayo ngowokuba akumelanga babonakale behamba bodwa nxa sekuhlwile.
Kubika intathelizindaba yeStudio 7 uMavis Gama ese Harare.
Lokhe sisendabeni eziphathelane labesifazana lempilakahle, inhlanganiso yamagqwetha alwela amalungelo oluntu, i zimbabwe lawyers for human rights, isihambise udaba lowesifazana otholakale elecala lokuthelela umkakhe igcikwane le ngculaza emthethwandaba we supreme court, isithi lumthetho awucaci njalo ubandlulula abesifazana okuyibo abavame ukuhlolwa kuqala lapho bezithwele.
Amagqwetha kankosazana samukelisiwe mlilo otholakale elecala lokuthelela umkakhe igcikwane lengculaza ngumthethwandaba wehigh court athi adinga ukuthi i supreme court itsho ukuthi lumthetho awubandlululi na abantu abelegcikwane njalo esithi akazwisisi ukuthi umantshi ogwebe umlilo ukutsho ngani ukuthi nguye owathelela umkakhe igcikwane leli.
Umlilo lomkakhe abazange bahlolwe igazi lapho betshada njalo bobabili babephuma kweminye imitshado okutsho ukuthi kulakho ukuthi yiloba uphi wabo angabe wayeselalo igcikwane leli.
Kubika intathelizindaba yeStudio 7 uNothando Sibanda.
