amalinks wokungena

Breaking News

Kuba Lokufola Ezithaladeni zeJohannesburg Kusolwa iXenophobia


Ukutshengisela kwabantu eJohannesburg besola iXenophobia

Abenhlanganiso zikazulu, iziphathamandla zikahulumende lezimele amanye amazwe kweleSouth Africa bafolile ezithaladeni zeJohannesburg NgoLwesine, betshengisela ukusola udlakela oluqondiswe kwabokuza olweXenophobia. Inkulungwane lenkulungwane zabantu abagoqela izizalwane zakwamanye amazwe zibe yingxenye kwalokhu kutshengisela obekujonge ukutshela labo abahlasela abakwamanye amazwe ukuthi bazawukhomba olotshwala.

Ngemva kwamaviki ambalwa kubhaxabulwa abakwamanye amazwe kweleSouth Africa, ngoLwesine izinkulungwane zabantu zifolile ezitaladeni zeJohannesburg zisithi ukuhlaselwa kwabakwamanye amazwe akuphele du.

Izizalwane zakwele South Africa lezakwamanye amazwe bezibambene izandla bonke bezwi linye lokuthi phansi ngexenophobia.

Umnumnzana Andy Mashaile, omunye wabaqoqe ukutshengisela loku njalo engumgcinisihlalo we Board Ebona ngokuvikelwa koMphakathi esabelweni seGauteng, uthi ukutshengisela kwabo lokhu kuphumelele kakhulu njalo umlayezo wabo ungene wazwela endlebeni zikazulu.

Isizalwane sakweleSouth Africa umnumnzana Mathias Makhonye, laye obengomunye wezinkulungwane zezizalwane zakwele South Africa ebeziyingxenye yalokhu kutshengisela, uthi ukutshengisela kwabo kuveza sobala ukuthi abakwamanye amazwe bemukelekile kweleSouth Africa.

Abebefolile laba batshengisele ukuba munye kukho konke ngengoba labaseSouth Africa bebevungama ingoma yezingungu ebezitshaywa ngabe Ivory Coast.

Inhlanganiso ye African Diaspora Forum enye yalezo eziqoqe ukutshengisela lokhu ithi ithokoze kakhulu ukubona inengi lezizalwane zakweleSouth Africa zizimisela ukuvikela abakwamanye amazwe.

Ngesikhathi sokutshengisela lokhu kwalabo abangafuni abakwamanye amazwe bahlutshwe, Umongameli Jacob Zuma laye ubethumele abaphathintambo bakhe ilizwe lonke ukuze bayetshumayela ivangeli lokuthi abakwamanye amazwe bengahlukunyezwa.

Yena ngokwakhe umongameli Zuma uqede iviki lonke eqhuba imihlangano lenkokheli zomphakathi ngalo njalo udaba lokuhlaselwa kwabakwamanye amazwe.

Lamanyathelo asenze labakwamanye amazwe batshayela eleSouth Africa izandla ngemizamo yalo yokuqeda iXenophobia.

Kodwake abanye abafana lesizalwane seZimbabwe umnumnzana Thubelihle Ndlovu bathi ukwesaba kulokhu kungakapheli.

Loba kunjalo uhulumende wele South Africa lezizallwane zaleli lizwe bathi balethemba lokuthi imizamo yabole izakwenza lamazwe abesecabanga ukuthi iSouth Africa lilizwe elilenzondo, babe kwazi ukuthi umuntu wonke wemukelekile kuleli.

XS
SM
MD
LG