Izizalwane zeZimbabwe ezihlala kwele South Africa zidlela evalweni kulandela imbiko yamanga ethi kulabanye babo ababulewe yizizalwane zakwele South Africa njalo leminye imbiko ethi ngenyanga ezayo kuzakuba lokutshengisela kwezizalwane zakwele South Africa zisola abokuza.
Limbiko etholakala ebulenjini be Internent laku Whatsapp ithi abokuza sokumele babuyele emakhaya abo ngoba sebeqede imisebenzi yezizalwane zakwele South Africa.
Eminye imbiko, elandulwe ngamapholisa akwele South Africa, ngethi soluqalisile udlakela lokubandlululana ngomhlobo njalo sokufe abantu abayisikhombisa bebulawa yizizalwane zakwele South Africa.
Ukufuthelana okukhona kwele South Africa kubikwa sokufike kusibanga esiphezulu ngoba izizalwane zakwele South Africa ezinengi azila misebenzi njalo ezinye zithi azitholi uncedo oluvela kuhulumende ngoba loluncedo lusiwa kwabokuza.
Sixoxe lesizalwane seZimbabwe esihlala kwele South Africa, uMnu. Denis Juru, ongumgcinisihlalo njalo wenhlanganiso ye International Crossborders’ Association.
"Siyizwile limbiko njalo eOlivia eJohannesburg sibone kulamapholisa amanengi kakhulu ... Abantu abasakwazi ukuthi amapholisa afuna ukubavikela kumbe ukuba bopha," kutsho uJuru.
