amalinks wokungena

Breaking News

Ukugqitshwa kwemidlalo yeAbsa PSL Kudanise Abadlali Bakwele Zimbabwe


Kaiser Chiefs

Ukufika emaphethelweni kwemidlalo yenguqu yakwele South Africa, eye Absa Premier Soccer League kutshiye inengi labadlali bakwele Zimbabwe abadlala beselizweni lelo bedanile ngenxa yezizatho ezitsheyeneyo.

Iqembu le Kaiser Chiefs lakwele South Africa liphenduke inhlekisa ngemva kokuhluthunelwa isicoco seligi ngosuku lokucina olwemidlalo lapho elibe ngutshiki lobhanqa 1 ka 1 lele Baroka kwathi lelo ebelincintisana lalo ele Mamelodi Sundowns lanqoba ele Black Leopards nge 3 ka 0.

Iqembu le Kaiser Chiefs lihlale phezu kwengalane okwemidlalo engamatshumi amabili lathoba minwe mbili ikanti ele Sundowns lihlale phezulu ngemva kwemidlalo eyosuku lokucina.

Sekuleminyaka emihlanu iqembu leKaiser Chiefs lacina ukuphakamisa isicoco seligi kodwa umlandeli weqembu le Chiefs uFaith Ndlovu uthi akulahlwa mbeleko ngokufelwa.

“Mina ngingumlandeli we Chiefs vele akujiki. Ukuthi yehlulekile ukuthatha iligi okusalayo vele liKhosi for life njalo emdlalweni vele kwesinye isikhathi uyanqoba, kwesinye isikhathi unganqobi,” kutsho uNkosazana Ndlovu.

Iqembu le Kaiser Chiefs lilabadlali abayizizalwane zelizwe le Zimbabwe ababalisa uWillard Katsande kanye lo Khama Billiat kusithi ele Mamelodi Sundowns lona lisetshenzelwa ngowayengukaputeni weqembu lama Warriors uPeter Ndlovu.

Ngaphansi kwengalane iqembu le Polokwane City yilo eligunyulwe kusigaba saphezulu okutsho ukuba abadlali bakwele Zimbabwe ababalisa unozinti uGeorge Chigova kanye labadlali baphakathi abathi uWalter Musona kanye lo Charlton Mashumba balakho ukuyadlala kusigaba se GladAfrica Championship ngesizini ezayo.

Abanye abakade besengozini eyokugunyulwa kusigaba saphezulu ngababalisa uElvis Chipezeze ongunozinti weqembu le Baroka lona eliphutshe imidlalo lisendaweni yetshumi lane, uButholezwe Mahachi kanye lo Talent Chawapihwa abeqembu leAmaZulu lona eliphutshe lisendaweni yetshumi lantathu engalaneni yemiklomelo.

Iqembu eliqede lisendaweni yetshumi lanhlanu ele Black Leopards lingene kumidlalo yama Play Offs lapho elizadibana khona lamaqembu abalisa ele Ajax Capetown kanye lele Tshakhuma Tsha Madzivhandila.

Imidlalo yama Play off iqale ngeSonto lapho iqembu le Ajax elitshaye khona ele Tshakhuma Tsha Madzivhandila nge 3 ka 2.

NgoLwesithathu iqembu le Ajax lizadlala lele Black Leopards njalo amaqembu lawa azadlala aphindane umphehlo ngemva kwalokho lelo elilemiklomelo eminengi kube yilo elizathola ilungelo elokuyadlala kusigaba saphezulu.

Facebook Forum

XS
SM
MD
LG