Ngeviki edluleyo kuqhamuke ukungezwani phakathi kwamalunga edale leStanding Committee yeMDC-T phezu kokukhethwa kukaMnu Nelson Chamisa loMnu Elias Mudzuri ngumkhokheli walelo bandla uMnu. Morgan Tsvangirai, ukuthi babe ngabasekeli bakhe, okwenze umhlangano walelodale wachithwa usanda qalisa.
UTsvangirai uthethe leli nyathelo lanxa evele elomunye umsekeli uNkosazana Thokozani Khupe. UMaKhupe ubikwa enguye ohle waveza ukungajabuli kwakhe ngaleli nyathelo.
Kulapho uTsvangirai atshelwe ukuthi wephula isisekelo sebandla ngokukhetha uMudzuri loChamisa, wacina ebanjwe ngamandla ukumisa lowo mhlangano waludlulisela phambili lwacina luhlaziywa izolo, lidale leNational Executive leleNational Council.
Isimanga yikuthi kucine kuvunyelanwa ukuthi kuguqulwe isisekelo sebandla ukuthi amadoda la womabili uChamisa loMudzuri bamukelwe njengabasekeli bakaTsvangirai.
Umbuzo osukhona uthi kutshoni lokhu? Ukuhlaziya lokhu upraxedes jeremiah uxoxe lengcwethi kwezokwethulwa kwezindaba uMnu. Simba Nembaware leyinye njalo ingcwethi ecubungula ezombusazwe uMnu. Kuda Hove onguye osungule ingxoxo.
UHove uthi: "UTsvangirai usebenzise amandla akhe wakhetha ngenkani abasekeli bakhe ekwenza ngezizatho yena labo bhururu bakhe abazayo."
UHove wengezelele esithi nxa kukhangelwa isisekelo sombuso webandla uTsvangirai wasephula.
UNembaware uthi lanxa besuke bahlala phansi ngoLwesithathu beloba inhlamvu zesisekelo sombuso ukuze zivumele abasekeli abathathu akusoze kuphathe kuhle ibandla leli.
"Ukuhlangana bahlangane kodwa usecreatary general uthe umhlangano wenkokheli usuthathwe wathatha isikhundla se congress. Asazi ukuthi nxa sebesenza njenge Zanu PF kuhamba njani."
