Ukukhethwa kukaMnu. Luke Malaba ukuthi abengumkhokheli wabehluli bedale laphezulu sekutshiye amaxuku akubandla leZanu PF athi ele G40 lele Team Larcoste esebambe phansi.
Amaxuku la abikwa ayesekela uNkosikazi Rita Makarau loMnu. Paddington Garwe abangaphumelelanga.
Ixuku le Team Larcoste libikwa lisekela umsekeli kaMongameli Robert Mugabe, uMnu. Emmerson Mnangagwa lanxa elandula lokhu.
Kuthi elinye icele, ele G-40 kumbe Generation 40 libikwa lisekela umka mongameli, uNkosikazi Grace Mugabe labanye abagoqela umphathintambo wezemfundo yaphezulu, uMnu. Jonathan Moyo.
Labo laba bayalandula imbiko yokuthi bakucele leli.
Sikhuluma nje ibandla leli lokhe liqhubekela phambili ngokuxotsha inkokheli okwaqala nyakenye kuze kuxotshwe umsekeli kamongameli uNkosikazi Mujuru.
Kuliviki kuxotshwe inkokheli yohlangothi lwabesifazane, olwe Women's League, uNkosikazi Sarah Mahoka loNkosikazi Eunice Sandi Moyo.
Ukudonselana amandla kwamaxuku la sokutshiye abanengi belemibuzo yokuthi kanti vele uMongameli Mugabe yena usekela liphi ixuku njengoba engakhethanga mahluli obengasekeli hlangothi?
Ukuhlaziya loludaba sixoxe lengcwethi kwezombusazwe, uMnu. Dinizulu Macaphulana, endawonye lengcwethi kwezemithetho, uMnu. Kucaca Phulu.
UPhulu uthi: "Ngiyavuma ukuba kulungile ukuthi uMalaba akhethwe ukuba ngu chief justice obevele engumsekeli ka chief justice. Kodwa isisekelo sombuso welizwe asenqabeli umongameli ukuthi akhethe laloba amfunayo."
UMacaphulana laye uvumelana loPhulu esengezelela ukuthi akula simanga ukuba uMalaba akhethwe kodwa okumangalisayo yikuthi kukhethwe umuntu ovela esigabeni esibandlululiweyo.
"Yena uMalaba ulexetsha lokuthi atshengise ukuba umthetho usebenza njani. Kulokukhangelela ukuthi uzasebenza njani," kutsho uMacphulana.
