Kube lokuxokozela kudlakela oluqhamuke phakathi kwabatshayeli bemitshova ethwala abantu phakathi kweChitungwiza leHarare lamapholisa ngoLwesibili.
Abatshayeli bamise ukuhamba kwemotha zabo betshengisela ukusola kwabo inhlawulo ephezulu kakhulu kulowo oyabe efunyenwe esephula imithetho yokuhamba kwemotha emigwaqweni eyethulwe ngumanisipala weChitungwiza. Bebesola njalo umkhuba omubi wamapholisa wokudinga ukufumbathiswa ebahlawulisa imali ezinengi bacine bengatholi nzuzo emsebenzi wabo.
Leli nyathelo libikwa liphazamise kakhulu uzulu osebenzisa imitshova le ukuya eHarare ikakhulu labo abasebenza khona okubangele ukuba inengi labo bacine bengayanga emsebenzini.
Abancedisa abatshayeli bale imitshova babikwa becine belwisana labasakhulayo beZanu PF abakade bezama ukubabamba ngamandla ukubuyela emsebenzini. Ngakwelinye icele owhindi babikwa becine behluphana labakade bezama ukuthwala abantu abezimotha zabo, abanye abasakhulayo bezama ukunceda abantu kwacina kubuya amapholisa okubangele inxabanxoza sokungazakali ukuthi leli icele lilwisana laliphi icele.
Umnumzana Marvelous Kumalo ngumqondisi wenhlanganiso elwela ilungelo lezakhamizi zeChitungwiza, eye Chitungwiza Residence Trust. UKumalo uchasise kabanzi ngokwenzakale ensukwini ezimbili ezedluleyo eChitungwiza kungxoxo ayenze leStudio 7.
"Okwenzakalayo yikuthi umanisipala weChitungwiza akafuni ukucetshiswa loba ukwemukela izikhalazo zezakhamizi okuyikh okucina kubangela ukudonselana kwamacele womabili"
