Uzulu uthi ukubotshwa kowake waba ngumkhokheli weZifa, uNkosazana Henrietta Rushwaya ezama ukuphuma elizweni legolide elibiza US$366,000 kuveza sobala ukuthi umnotho welizwe uhuquluzwa ngabantu abasezikhundleni.
URushwaya, ongumkhokheli wenhlanganiso yabembi, iZimbabwe Miners’ Federation ubotshwe ngoMvulo eHarare ezama ukugada indizamtshina efihle igolide leli elubhekise eDubai.
Amapholisa athi ubengelancwadi ezimvumela ukuphuma legolide leli kanti njalo ubengabhadalanga imithelo efunakalayo.
Umsekeli wesikhulumeli seMDC Alliance uMnu Felix Magalela Mafa Sibanda utshele iStudio 7 ukuthi imisebenzi yobusela enje yiyo ebulala umnotho, hatshi izijeziso zenotho.
“Akuqali namhlanje okokuhuquluza amatshe aligugu,” kutsho uMafa. “I-Chiadzwa leminye imigodi yahuquluzwa abantu bekhangele ilanga libalele.’
Kodwa ilunga leZanu PF uMnu Believe Gaule uthi lanxa evuma ukuthi umnotho uhuquluzwa ngabantu abasezikhundleni, izijeziso lazo zilomthelela omubi.
“Sibuhlungu sonke ngendaba yenkohlakalo le, kodwa mina angivumelani labanye nxa besithi inkohlakala yiyo yothwa ebulala umnotho. Ama-sanctions ngumuntu lodadewabo lobusela lobu,” kutsho uGaule.
Ngomnyaka ka2016 owayenguMongameli uMnu Robert Mugabe waveza ukuthi iziphathamandla zikahulumende wakhe zazintshontshe iUS$15 billion yamadayimana eMarange.
Kodwa kuze kube namuhla ekekho loyedwa owabotshwayo. Unobhala jikelele weZCTU uMnu Japhet Moyo ukuntshotshwa kwenotho yeZimbabwe ngabantu abasezikhundleni eziphezulu kulimaza uzulu makhaza.
“Esikubonayo yikuthi bona abasibusayo basuke bathathe konke abakutholileyo bayefaka emabhanga aphandle kwelizwe bengasetshwa nxa bephuma, akusimangalisi ke lokhu,” kutsho uMnu Moyo.
Abebandla leZanu PF bathi ukubotshwa kukaNkosazana Rushwaya kuveza sobala ukuthi uhulumende uzimisele ukulwisana lenkohlakalo.
Kodwa ingcwthi kwezombusazwe uMnu Effie Dlela Ncube uthi nxa uhulumende ezimisele kumele atshengise ngokubopha ingqungquthela ezaziwayo.
