Idale leEuropean Union Parliament lethule umbiko ngoLwesine lisola uhulumende weZimbabwe ngokungenzi lutho ngokunyamalala kukamnumzana Itai Dzamara lisithi kumele adingwe atholakale ngokuphangisa.
Lelidale lithi kuyadanisa ukubona ukuthi uhulumende weZanu PF uqhubeka esephula amalungelo oluntu.
Lithi njalo uhulumende kumele alandele inkuthazo yedale laphezulu ele High Court eyokuthi kumele adinge uDzamara njalo amapholisa azise uzulu ngemva kwawo wonke amaviki amabili ukuthi sefike ngaphi ngokudingisisa kwawo.
Umbiko lo uza ngemva kweviki eyodwa umanyano weEU ukhuthaze njalo uhulumende weZimbabwe ukuthi akhulule uDzamara nxa elaye njalo abathumbi bakhe babotshwe.
Abamabandla aphikisayo elizweni abagoqela umnumzana Morgan Tsvangirai kanye labalwela amalungelo oluntu labo bathi uhulumende weZanu PF kumele adinge uDzamara atholakale ngokukhulu ukuphangisa.