Uhulumende sekhuthazwe ukuthi elawule ukusetshenziswa kwemithi yesintu kanye leminye eyezihlahla evela ikakhulu kweleChina (Herbal Medicines).
Imithi le ithengiswa yiloba ngubani njalo isetshenziswa ngabantu abanengi, ikakhulu abangasebenziyo, abangela mali yokuya ezibhedlela lokuthenga lamapilisi.
Umbuzo omkhulu ngothi kambe imithi le ilungele umzimba na?
Ukusetshenziswa kwemithi le sekuvamile eZimbabwe, inengi labantu selisenza ibhizimisi ngayo liyithengisa ivela emazweni afana leSouth Africa leChina.
UMnu Richard Mahlangu, uthi yonke nje imithi yokwelapha ivela ezihlahleni.
Ngalokho, uthi okuqakathekileyo yikuthi uhulumende afake imigoqo ezalawula ukusetshenziswa kwayo.
Wengeze wathi kudala abantu babesazi ukuthi yisiphi isihlahla esisetshenziswa nxa kutheni, kodwa le imithi esithengiswayo akwaziwa ukuthi yizihlahla zawuphi umango lokuthi zihloliwe na.
Ngaleso sizatho, uMnu Mahlangu uthi abantu kumele bayisebenzise ngonanzelelo limithi.
UNkosikazi Nobuhle Mathe, ongumongikazi, uthi kakhuthazi ukuthi abantu basebenzise imithi le nxa begula bengayanga esibhedlela.
Abayithengisayo limithi bathi iyelapha imikhuhlane yegazi, eyetshukela, ibuye igezise isisu, icwazimulise ijwabu njalo lokunye okunenginengi.
Omunye wabenza ibhizimisi le nguNkosikazi Rita Nkomo yena othi iyasebenza limithi ngoba ayidali nhlupho eziphathelane lokungenzakala nxa uyinatha.
Isakhamuzi, uNkosikazi Melody Nkala, uthi uyakhuthaza ukusetshenziswa kwemithi lezihlahla ngoba lemithi yesibhedlela isuka ezihlahleni ezitshiyeneyo.
Wengeze wathi endulo abantu babevele bephila ngemithi yonale, abantwana bakhule beqiniswa ngentolwane lesihaqa. Ngakho uthi kaboni lutho olubi kumbe olungalunganga ngemithi le.
Abezempilakahle bathi lanxa uzulu wayevele ezisebenzisela izihlahla lemithi yesintu kudingeka imithetho yokulawula lokhu ikakhulu njengoba sokwagcwala izigelekeqe ezihamba zithengisela abantu imithi engalunganga zisithi yizihlahla zesintu.
