Uhlangothi olubona ngezomkhathi kwele Zimbabwe lubikwa ukuthi uzulu kumele alimuke ingozi yokutshisa okwedlulisa amalawulo okukhona elizweni ngalezi nsuku, okukhangelelwe ukwengeza ngamandla kumalanga amalutshwana alandelayo.
Sikhuluma nje ilanga liyatshisa elizweni okokupheka inhlanzi eziphume emanzini kodwa osekwethusa uzulu ngumbiko othi lumumo uzaguquka kutshise ukwedlula okwenzakala manje.
Isakhamuzi sedolobho le Victoria Falls, uMnu.Thembinkosi Sibindi utshele iStudio Seven ukuthi izakhamizi zalumango kanye lezethekeli sezithwele nzima ngokutshisa lokhu.
"Lesi simo siyasethusa ngempela ngoba sicina sizibuza ukuthi lonyaka pho, asisoze safa saphela siqedwa yilokhu kutshisa na? Abantu kabasenelisi lokuhamba besiyabuka ubuhle bempompoma zamanzi awomfula uZambezi awe Victoria Falls, ngoba kuyatshisa esigazake sikubone" kutsho uSibindi
Umumo wokutshisa lo ubikwa usesibangeni esingajwalekile hatshi eZimbabwe kuphela kodwa usuludubo olubhekane labantu bonke abasemazweni asemuhlubulweni wangezansi kwezwekazi leAfrica.
