Umdeni kamuyi uRobert Gabriel Mugabe, ongcwatshwe izolo koZvimba, uthi induna zosendo lwakoMugabe zaphazamisa ukungcwatshwa kwakhe hatshi uMongameli Emmerson Mnangagwa.
Bethule lokhu ngesikhathi inkokheli yebandla leZanu PF isidla amalahle ngokungcwatshwa kukaMugabe koZvimba esabelweni seMashonaland West lobanje besokusakhiwa isihonqo esibizwa ngokuthi yimausoleum eNational Heroes Acre eHarare.
Izihlobo ezimbalwa ziveze ukuthukuthela ngokubekwa kukamuyi ezithi kuphazamiswe ngumdeni obungavumelani ngokuthi angcwatshwe emzini wakhe kumbe eNational Heroes Acre.
Lokhu kuvezwe ngezinye izihlobo ngesikhathi kungcwatshwa uMugabe, owayengumongameli welizwe leZimbabwe, owabhubhela kwele Singapore mhlaka 6 Mpandula.
Udadewabo kamuyi uDokotela Regina Gata, oqale ngokubonga umusa kaMnangagwa ngokuvumela abemuli ukuthi balandele izifiso zikamuyi, utshele uzulu obebuthene emzini kaMugabe ukuthi ukudonselana okubekhona sonke lesi isikhathi bekungelani loMnangagwa.
UDokotela Gata uthi okwenziwa ngabantwana bakamuyi kwakuyindlela eyahlelwa nguMugabe engakabhubhi. Uthi umuyi wabatshela ukuthi ufisa ukungcwatshwa emzini wakhe koZvimba.
Uthi umnewabo esaphila wabatshela ukuba ufisa ukuthi angcwatshwe njani njengoba wayelandela ukholo lweSiKhristu.
Kodwa abakhulume lentathelizindaba yomsakazo weStudio 7 bathi kubi okwenziwe ngumdeni kamuyi. Omunye wabalombono lo nguMnu. Victor Dube, isakhamuzi selokitshini leBudiriro eHarare.
UDube uthi okukhona yikuba umuyi wethula okwakusenhlizweni yakhe ngoba wabhubha ezondele uMnangagwa kulandela ukumsusa kwakhe esikhundleni encedisana labutho.
Kaboni uMnangagwa ephindisela emulini kamuyi ngalokhu abakwenzileyo lobanje ibandla leZanu PF lisidla amalahle ngokungcwatshwa kuka Mugabe koZvimba hatshi eNational Heroes Acre.
Kasenelisanga ukukhuluma ngodaba lolu leziphathamandla zikahulumande, induna zosendo lwakoMugabe kanye lenkokheli yebandla elubusayo.
Ibandla leZanu PF lethule umbiko izolo kusihlwa othi kuyayangisa kakhulu okwenziwe yimuli kamuyi ngoba umdeni wakhe wavumelana lohulumende ukuthi uzakwakhelwa isihonqo eNational Heroes Acre eHarare. Ibandla leli lithi ukungcwatshwa khwakhe koZvimba sokululaze indoda eyalwa impi yenkululeko yakhokhela ilizwe leZimbabwe okweminyaka engamatshumi amathathu lasikhombisa.
