Icele lenhlanganiso emela izisebenzi iZimbabwe Congress of Trade Unions (ZCTU) elikhokhelwa nguMnumzana Lovemore Matombo ngoLwesibili lisole kakhulu ibandla le Movement for Democratic Change (MDC) elikhokhelwa nguMnu. Morgan Tsvangirai ngokungabuyi embuthanweni walo owenzelwe eHarare Gardens.
Unobhala jikelele welinye icele leZCTU uMnu. Raymond Majongwe utshele lumbuthano ukuba iMDC ibimele isebenze njengo mlamulankunzi kulokuthatha icele lenhlanganiso le elikhokhelwa nguMnu. George Nkiwane eliyenzele umbuthano walo eGwanzura Stadium eHarare.
Edolobheni lakoBulawayo, icele le ZCTU elikhokhelwa nguMnu. Nkiwane lenzele umkhosi wokunanza ilanga lezisebenzi eWhite City, icele elikhokhelwa nguMnu. Lovemore Matombo lenzela owayo eStanely Square.
Umnu. Percy Mcijo umqondisi we ZCTU koBulawayo omele icele lika Mnu. Nkiwane uthe iziphathamandla zikahulumende ezikubandla le MDC elikhokhelwa nguMnu. Tsvangirai zibuye ngobunengi bazo emkhosini lo.
UMcijo uthe uMnu. Gorden Moyo umphathintambo wezamafekithali kahulumende utshele izisebenzi ukuthi kukhangelelwe ukuthi isisekelo sombuso welizwe esitsha sinike izabelo amalungelo okuthuthukisa uzulu – iDevolution of Power.
Uphinde wathi abamele iZCTU bacele uhulumende ukuthi akhengele amankampani eChina alabaqondisi abahlukuluza izisebenzi.
Umnu. Clement Moyo ingcwethi kwezombusazwe uthi ukudabuka kwe ZCTU kubisela muva imizamo yokulwela amalungelo ezisebenzi.
