Amalunga ebandla le MDC elikhokhelwa nguMnu. Welshman Ncube abalisa lenkokheli asuke kulelibandla ngempelasonto.
Kodwa amalunga la athi lanxa engakakhulumisani ukuthi elakusasa limi njani kawavumanga ukuthi bafuna ukusungula ibandla kumbe hatshi.
Amalunga la abalisa owayengumphathintambo wezokuxolelana, uMnu. Moses Mzila Ndlovu, owayeqoqa inhlelo zebandla, uMnu. Esoph Mdlongwa, labake ababa ngamlunga edale lephalamende, uMnu. Abednico Moyo, Duduzile Dube lo Killian Masuku.
Ngomnyaka ophelileyo ixuku lele laloba ugwalo lwezikhalazo ezibalisa ukungabaluleki kwenhlelo zebandla, ukuba nguntando kayiphikiswa kuka Ncube lezinye izizatho ezinenginengi.
Imizamo yokukhuluma loNcube yehlule ngoba ubengaphenduli ucing lwakhe.
UMzila Ndlovu, owamiswa ukuba ngunobhala jikelele ngemva kwencwadi yezikhalazo zabo, uthi basuke kulelibandla ngoba izikhalazo zabo zingakhangelwanga.
"Kuliqiniso baba okutshoyo ukuthi thina esasihlangeni sifuna ukuthi kube lokukhulumisana loMnu. Welshman Ncube njengomkhokheli we MDC. Sesisole into ezithile esazifika ephepheni ukuze sizwe ukuthi uthini ngakho. Sonke lesi isikhathi besisithi yinto ezalalelwa," kutsho uMzila Ndlovu.
