Ukwala kukahulumende ukuthi engazavumele ukugcotshwa kwenkosi sekudale inkulumo. Umphathintambo wezabelo, uMnu. July Moyo utshele idale leSenate ngeviki edluleyo ukuthi uhulumende kasoze avumele ukugcotshwa kwenkosi yamaNdebele ngoba inkosi ayikho phansi kwesisekelo sombuso welizwe.
UMoyo uthi lokhu asikho kubandlulula ngomhlobo ngoba lase siShoneni uhulumende wala ukuthi kuvuselelwe ubukhosi buka Monomotapa.
Kodwa inengi liyayisola imbono kaMoyo lisithi ukuvumela ukuthi kube lezinduna elizweni kuyafana lokuthi kuvunyelwe inkosi ngoba layo iyinkokheli yomdabu.
Omunye abalombono lo nguMnu. Max Mkandla esiqale ngokumbuza ukuthi uthini yena njengoba inkosi ithiwa kayikho kusisekelo sombuso?
“Ye akukho esisekelweni sombuso ngokubona kwakhe kodwa ke izinduna zikhokhelwa yinkosi yikho amele abekwazi,” kutsho uMkandla.
Uthi uqinisile ukuthi akukho kusisekelo sombuso kodwa amele akuqaphele yikuthi nxa ugamula isihlahla kumele udonse lamahlala aso.
Uthi ibandla leZanu PF lifuna ukusebenzisa izinduna kwezombusazwe.
“Nxa inkosi ikhona ayingeni kwezombangazwe kodwa bayazinika izimota izinduna ukwenzela ukuthi zincindezele abantu ezabelweni zabo.