Ukwethekelela eZimbabwe kwequla leMelika elilesisindo esiphezulu kuliviki okwakuqala eminyakeni eminengi sokuphehle umbuzo othi kambe uhulumende weMelika engaba esedinga ubudlelwano obuhle leZimbabwe na.
Abakuqula leli bagoqela umsekeli kamabhalane obona ngobudlelwano beMelika lamanye amazwe uMnu Shannon Smith lomsekeli kamabhalane okhangelane lezamalungelo oluntu uMnu Steven Feldstein.
Iqula leli selihlangane leziphathamandla zikahulumende ezigoqela Umphathintambo wezemali uMnu Patrick Chinamasa lomabhalane kugatsha olubona ngobudlelwano beZimbabwe lamanye amazwe uMnu Joy Bimha.
Bakhangelelwe ukuhlangana leziphathamandla zamabandla aphikisayo kanye labenhlanganiso ezizimeleyo.
Ekhuluma eHarare ngoLwesithathu uMnu Feldsten uthe iMelika ilesifiso sokudlelana kuhle leZimbabwe.
Kodwa uthe bafuna uhulumende alungisise konke okuhluphayo kuqala okugoqela ukulondolozwa kwamalungelo oluntu.
Ukuhlaziya loludaba sixhume ingcwethi kwezombusazwe uMnu Nhlanhla Dube kanye lelunga leZanu PF uMnu Morris Ngwenya laye ohlaziya ezombusazwe.
