amalinks wokungena

Breaking News

Ulitshayele Emambuleni uKnox kuDSTV Premiership eSouth Africa


Soccer Ball

Balitshumi abadlali benguqu abakwele Zimbabwe abayenelise ukudlala ngempelaviki eyedluleyo kusigaba seDSTV Premiership elizweni le South Africa.

Umgadli uKnox Mutizwa nguye yedwa umdlali oyisizalwane sakwele Zimbabwe owenelise ukulitshayela emambuleni kumidlalo edlalwe ngempelaviki eyedluleyo esigabeni se DSTV Premiership elizweni lase South Africa.

Kubadlali abalitshumi abakuleli abaphatheke kumidlalo yesigaba se DSTV Premiership abayisithupha abagoqela laye uMutizwa bangene besuka ebhentshini okuyinto umlandeli womdlalo wenguqu uBongani Zoza athi kumele iguquke.

“Ukungadlalwa komdlalo wenguqu kwele Zimbabwe ngenxa ye Covid – 19 kutsho ukuba abadlali abanengi abazaphatheka kumkhankaso wokudinga amaqembu azakuyaphatheka kumidlalo ye Africa Cup of Nations bazavela phandle kwelizwe.

Ngalesosizatho kuqakathekile ukuba laba abadlala kwele South Africa, inengi labo abavele beyingxenye yeqembu lesizwe, batholakale bedlala emaqenjini abo ukuze babe sesimeni esihle esokuba bengadlala kuqembu lama Warriors,” kutsho uZoza.

Abadlali abadlale kusukela imidlalo iqala ngababalisa uWashington Arubi, ongunozinti weqembu le Tshakhuma Tsha Madzivhandila lona elitshaywe nge 1 ka nya ngele Bloemfontein Celtics elidlalelwa nguRonald Pfumbidzai laye oliqalisileyo ngoMgqibelo.

Omunye nguDivine Lunga oweqembu le Golden Arrows lona elinqobe ele Maritzburg United nge 2 ka 1 njalo ohlohle igoli labo elesibili nguMutizwa yena oqale esebhentshini wangena ngehlandla lesibili lomdlalo ndawonye lo Danny Phiri yena ongene sekusele imizuzu elitshumi lanhlanu ukuba umdlalo uphele.

UOvidy Karuru laye uliqalile lapho iqembu lakhe le Black Leopards libhaxabulwa nge 3 ka nya ngele TS Galaxy ngoMgqibelo.

UWillard Katsande ungene evela ebhentshini lapho iqembu lakhe le Kaizer Chiefs litshaywa nge 2 ka 1 ngele Orlando Pirates lona elingaphanga uTerrence Dvukamanja ithuba lokudlala loba nje kade ehlezi ebhentshini.

NgoMgqibelo njalo uEvans Rusike kanye lo Kuda Mahachi labo bangene besuka ebhentshini ngehlandla lesibili lomdlalo weqembu labo ele Supersport lele Swallows wona ophele zingutshiki lobhanqa 1 ka 1.

NgoLwesihlanu uButholezwe Ncube laye ungene ngehlandla lesibili emdlalweni obuphakathi kweqembu lakhe ele Amazulu lele Stellenbosch wona ophele ele Amazulu linqobe nge 2 ka 1.

Iqembu le Mamelodi Sundowns, elisentshenzelwa ngowayengukaputeni weqembu lama Warriors uPeter Ndlovu, selikhokhela ngemiklomelo emihlanu phezu kwengalane yemiklomelo ngemva kokudlala imidlalo elitshumi lanhlanu njalo linqobe ele Chippa United nge 2 ka nya ngeSonto.

Endaweni yesibili kuleqembu le Supersport, lona eliqeqetshwa yisizalwane sakwele Zimbabwe uKaitano Tembo kanye lele Swallows wona alemiklomelo engamatshumi amabili lathobaminwe mbili kusithi ele Sundowns lilemiklomelo engamatshumi amathathu lantathu.

Facebook Forum

XS
SM
MD
LG