amalinks wokungena

Breaking News

I-PSL Yethula Uluhlu Lokuhlela Ukuba Imidlalo Yenguqu Idlalwa Njani Lonyaka


Castle Lager PSL

Inhlanganiso yamaqembu enguqu adlalela esigabeni saphezulu ese Premier Soccer League isiyethule uluhlu lokuhlela ukuba amaqembu azadlala njani kulumnyaka ka2016.

Imidlalo yesigaba seCastle Premier Soccer League ikhangelelwe ukuqala mhla zimbili ngenyanga kaMabasa.

Uluhlu lokuhlela ukuba amaqembu azadlala njani lonyaka olwethule yinhlanganiso ye PSL ngoLwesibili luveza ukuba iqembu eliphakamise isicoco sanyakenye ele Chicken Inn lizadlala lele Dynamos koBulawayo emidlalweni yeviki lakuqala.

Iqembu le Dynamos yilo ebeliphakamise linkezo okweminyaka emine ilandelana phambilini kokuyihluthunelwa ngele Chicken Inn njalo lonyaka liqhatshe umqeqetshi oyisizalwane selizwe le Portugal uPaulo Jorge Silva.

Kweminye imidlalo eyeviki lakuqala lesizini yalonyaka, iqembu le Highlanders, lalo eliqhatshe umqeqetshi ovela phetsheya kolwandle, uErol Akbay we Netherlands, lizavakatshela iqembu le Hwange, iqembu elingene lonyaka kusigaba saphezulu ele Bulawayo City lizangqikilana lele How Mine, iqembu leZPC Kariba lizadlala lele Border Strikers, ele Triangle lizadibana lele Harare City, ele Caps United lizatshayana lele Chapungu, amaqembu amatsha kusigaba se PSL athi ele Mutare City kanye lele Ngezi Platinum azadlala womabili kuthi iqembu le FC Platinum lizadlala lele Tsholotsho.

Umqeqetshi weqembu lenguqu ele Tsholotsho, uLizwe Sweswe
Umqeqetshi weqembu lenguqu ele Tsholotsho, uLizwe Sweswe

Umqeqetshi weqembu le Tsholotsho uLizwe Sweswe ulwamukele uhlelo lokuba amaqembu azadlala njani lonyaka esithi akumethusi lokuba bazaqala leFC Platinum okungeyinye yamaqembu ayelwisa ukuphakamisa inkezo nyakenye.

Isifiso senhlanganiso yePSL yikuba kuthi kufika inyanga kaNkwenkwezi sekudlalwe imidlalo eyithoba munwe munye njengoba imidlalo yeligi kuzamele idedele imidlalo eqoqwa yinhlanganiso yeZifa eye AfroAsia.

Kulimpelaviki ezayo amaqembu alandelayo azadlala imidlalo yequarter – final kumncintiswano we ZNA Charities. Iqembu le Highlanders lizadlala lele Chicken Inn, iqembu le Harare City lizadlala lele Caps United, kuthi ele FC Platinum lizadlala lele How Mine.

Iqembu le ZPC Kariba livele selikusigaba se semi-final ngemva kokunqoba ele Dynamos ngempelaviki edluleyo.

XS
SM
MD
LG