Amalunga eMDC Alliance uNkosazana Joana Mamombe loCecilia Chimbiri bazaphindela emthethwandaba namuhla lapho inkantolo ezaqhubeka ihluza isicelo sabo sokuthi bakhululwe ngemali yesibambiso i-bail.
Ababili laba bebesemthethwandaba izolo kodwa ukuhluzwa kodaba lwabo akuphelanga.
Isigodlo seBhilithani eZimbabwe sithi sibheke ngamehlo okhozi udaba lokuthosiswa kukaMamombe loChimbiri, bona abetheswa icala lokuthuka amapholisa ngesikhathi ezama ukubopha abasakhulayo abatshengisele eHarare ngoMvulo.
Ababili laba kanye loNkosazana Netsai Marova bake babotshwa nyayenye besetheswa icala lokuqamba amanga ngokuthi bathunjwa njalo bahlukuluzwa.
UMarova laye ubebotshiwe ngoMvulo kodwa wasuka wakhululwa engetheswanga cala.
Okwamanje uMamombe loChimbiri bavalelwe ejele leChikurubi.
Esinye isiphathamandla seMDC Alliance uMnu. Job sikhala uphume entolongweni izolo ngemva kokuvunyelwa ukuhlawula imali yesibambiso lidale leHigh Court.
Kodwa abanye abalwela amalungelo oluntu, abafana loMnu Allan Moyo, balokhe bevalelwe ngamacala ehlukeneyo.
Isikhulumeli somkhokheli weMDC Alliance uDr. Nkululeko Sibanda utshele iStudio 7 ukuthi uMnu Nelson Chamisa uzakwethula umbiko eqakathekileyo maduze ngokwephulwa kwamalungelo oluntu.
Kusenjalo, ibandla leMDC Alliance lithi ukuhlukuluzwa kwabantu okunje yikho okubangele ukuthi iBhilithani yethese iziphathamandla zikahulumende weZanu PFf ezine izijeziso zetho ngoMvulo.
Iziphathamandla lezi zibalisa usikomitshi wamapholisa uMnu Godwin Matanga, umphathintambo wezomvikela uMnu Isaac Moyo, umphathinambo wogatsha lwamaCIO uMnu Owen Ncube kanye lowake wahola ugatsha olulinda uMongameli uMnu Anselem Nhamo Sanyatwe.
Ilunga leMDC Alliance uMnu Edwin Ndlovu utshele iStudio 7 ukuthi ukubotshwa kwaboSikhala laboMamombe kuveza sobala ukungahlonitshwa kwamalungelo.
Kodwa ilunga leZanu PF uMnu Believe Gaule uthi eleBhilithani lethese iziphathamandla lezi izijeziso ngoba lilokhu lithukuthele ngokuthathelwa kwabalimi amapulazi nguhulumende.