Abesifazana beMDC Alliance ababili uNkosazana Joanna Mamombe loCecilia Chimbiri, bona abakhululwe izolo ngemva kokuvalelwa ejele leChikurubi okwenyanga ezimbili, bazabuyela enkantolo namuhla ukuyabhekana lelinye njalo icala elokuthi baqamba amanga ukuthi bathunjwa nyakenye.
Lokhu kufakazwe ligqwetha labo uMnu Paidamoyo Saurombe. Ababili laba bebeseChikurubi ngemva kokubotshwa ngoMbimbitho besetheswa icala lokwephula iziqondiso zokwenqabela iCovid-19.
Besebencitshwe imvumo yokuthi bakhululwe ngesibambiso se-bail kathathu, kodwa umahluli weHigh Court uze wabakhulula ngesibambiso samadola azinkulungwane ezingamatshumi amabili, Z$20,000 ye-bail ngamunye izolo.
Baphume eChikurubi phakathi kobusuku bahlangabezwa ngamalunga eMDC Alliance lemindeni yabo. UMamombe umela isigaba seHarare West ephalamende.