Kakalahli ithemba umqeqetshi weqembu lomdlalo wenguqu ele Highlanders uMandla Mpofu loba nje ezulelwa ngamangabuzane.
Iqembu le Highlanders liqhubekela phambili liqhuba nzima esigabeni se Castle Lager Premier Soccer League njengoba ngeSonto lehluleke ukunqoba iqembu elingene lonyaka esigabeni lesi saphezulu ele Mushowani Stars emdlalweni oqhutshelwe enkundleni ye Barbourfields.
Lumdlalo uphele zingutshiki lobhanqa loba nje iqembu le Bosso belikhulela ele Mushowani njalo kulezibukeli ebezihlezi endaweni yeSoweto kanye laseMpankweni ezibonakale sezibhabhayisa okungabe bekuyindlela eyokuvalelisa abaqeqetshi baleliqembu bona okuphume umbiko othi baphiwe imidlalo emithathu ukuba bathole imiklomelo eyisithupha ukuze batshengise ukuba bayenelisa yini ukukhokhela leliqembu.
Impumela yalumdlalo wangeSonto kanye lowangoLwesine olwedluleyo lapho iqembu le Highlanders elinqotshwe khona ngele Triangle nge 2 ka 1 itsho ukuba abaqeqetshi laba kabangeke bathole imiklomelo eyisithupha loba bengaze betshaye iqembu le Hwange emdlalweni walo olandelayo kodwa oka Mpofu utshele intathelizindaba ukuba yena kakwazi ukuba uphiwe imidlalo emithathu ukuba akhombise ukuba uyenelisa ukuqhubekela phambili engumqeqetshi we Bosso.
“Sahlala phansi labadala sibonisana ukuthi njengoba izinto zingathi azihambi kuhle ngcono sisiyaphambili sikhangele imidlalo ebuyayo sithi thina kulawa amathathu abuyayo singathola yini imiklomelo eyisithupha nxa kuvuma. Ngemva kwaleyo midlalo siphinde sihlale phansi njalo sikhangele eminye elandelayo siqgubeka sisiyaphambili.
Konke lokhu sasikuxoxa nje sizihlalele sisidla.
Sidlale kuhle kakhulu kodwa kusuka kube nzima ukuthi umuntu azwisise ukuthi sidlale kuhle nxa ibhola lingasangenanga emambuleni,” kutsho uMpofu.
Iqembu le Highlanders lihlezi endaweni yetshumi lantathu engalaneni yemiklomelo lilemiklomelo engamatshumi amabili lane ngemva kokuba lidlale imidlalo engamatshumi amabili lanye.
Phezu kwengalane kuhlezi iqembu le ZPC Kariba lona elinqobe ele Yadah nge 1 ka nya namhla emini njalo elilemiklomelo engamatshumi amathathu lathoba munwe munye.
Endaweni yesibili kuleqembu le Chicken Inn lona elinqobe ele FC Platinum nge 2 ka 1 ngoMgqibelo njalo elilemiklomelo engamatshumi amathathu lathoba minwe mbili.
Iqembu le CAPS United lihlezi endaweni yesithathu lalo lilemiklomelo engamatshumi amathathu lathoba minwe mbili kodwa lisendaweni yesithathu ngoba ele Chicken Inn lihlohle kanengi.
Iqembu le FC Platinum lehle layahlala endaweni yesine engalaneni lilemiklomelo engamatshumi amathathu lesithupha.
Emsileni wengalane kuleqembu le Yadah elilemiklomelo elitshumi lesikhombisa kuthi phezu kwalo kuleqembu le Bulawayo Chiefs kanye lele TelOne alemiklomelo engamatshumi amabili ikanti iqembu elihlezi endaweni yesine nxa usuka emsileni ngele Mushowani Stars elilemiklomelo engamatshumi amabili lambili.
