Ibandla leRenewal Democrats of Zimbabwe liqale umhlangano walo omkhulu wamalanga amabili owe Congress, ngoLwesihlanu, lapho uMnu. Elton Mangoma osungule lelibandla ekhethwe ukulikhokhela kungela omncintisayo.
Kubikwa bekulabantu abafika phose inkulungwane ezimbili emhlanganweni lo owenzelwa eHarare. Lelibandla lihlaziye isisekelo sombuso walo njalo belikhangelelwe ukwenza ukhetho lokukhetha amanye amalunga emhlanganweni lo ophela ngoMgqibelo.
UMangoma, owake waba ngumphathintambo wezamandla kagetsi laminye imililo utshele iStudio Seven ukuthi ozakuba ngumsekeli wakhe nguNkosikazi Beauty Kerr, laye ongancintiswanga. Wathi ibandla lakhe lizimisele ukusebenzelana lamanye amabandla alembono efana leyebandla lakhe kodwa esithi kabasoze bajahe loku.
Isikhulumeli sebandla leli, uMnu. Pishai Muchauraya, laye ongancintiswanga, uthe ibandla labo lokhu lithola usekelo nsuku zonke njalo lilamalunga edale lephalamende asebenzelana lalo kodwa kathandanga ukuwaqamba ngamagama.
UMangoma nguye owasungula lelibandla ngemva kokungezwani labanye bakhe ababesuke kubandla le MDC-T besola ubukhokheli bukaMnu. Morgan Tsvangirai.
Ingcwethi ecubungula ezombusazwe, uMnu. Rejoice Ngwenya utshle umsakazo weStudio 7 ukuthi kusobala ukuthi lelibandla kaliqininga ukuthi lingenelisa ukumisana lele Zanu PF.
