UImthethwandaba wedolobho le Victoria Falls ulahle khatshana icala labantu abalitshumi, abagoqela abamhlophe ababethekelele ilizwe ngoba babetshengisela ngenyanga ka Nhlangula.
Umantshi uthe kabalacala ngoba belelungelo lokutshengisela phansi kwesisekelo sombuso.
Abantu laba, abagoqela lamakhansila, babotshwa bezimele emgwaqweni bethwele amabhakane asola umbuso okhona besithi kumele ulungisiswe kuqedwe ukungethembeki lodlakela.
Omunye olwela ilungelo loluntu, uMnu. Zenzele Ndebele owasungula isikhwama sokuphathisa ababotshwa ngesikhathi sokutshengisela uthi isikhwama lesi sesilemali elutshwana.
UNdebele utshele iStudio Seven ukuthi lesi sikhwama okwakathesi siphathisa omunye osakhulayo owagokeka unyawo, uMnu. Kukhanya Kwenkosi odinga inqola yokuhambisa, iwheelchair.
"Okwakathesi akulamuntu osesitokisini koBulawayo. Bonke ababefika phose ikhulu sabakhulula ngemali yesikhwama lesi," kutsho uNdebele.
