amalinks wokungena

Breaking News

Kubunjwa Umanyano weWeb of Love Trust koBulawayo


Web of Love Trust

Abenza imisebenzi yezemidlalo lamasiko edolobheni lako Bulawayo sebebumbe umanyano obizwa ngokuthi yi Web of Love Trust kungumzamo wokuthuthukisa impilo zabo.

Kujwayelekile ukuba nxa sekuthe kwedlula emhlabeni umuntu obesenza umsebenzi wokulingisa loba ukucula kuzwakale sekuthutsha indaba zokuba lumuntu ufe engela yona isenti elesikhala loba nje ebekade engosaziwayo ethokozisa abanengi ngemisebenzi yakhe.

Isimo esifana lalesi yiso esidale ukuze abakuhlangothi lwezemidlalo lamasiko edolobheni lako Bulawayo bacabange ukubumba inhlanganiso ebizwa ngokuthi yi Web of Love yona enxwanele ukubaphathisa ukuba bangancindezelwa emsebenzini wabo bathole imfanelo zabo.

Umgcinisihlalo walinhlanganiso uThomeki Dube, olilunga leqembu le Black Umfolosi, uthi njengoba nje igama lisitsho linhlanganiso ifana lobulembu obugoqela bonke abenza imisebenzi yezemidlalo.

Inhlanganiso ye Web of Love Trust ibhaliswe okusemthethweni mhla ziyithoba minwe mbili kunyanga kaMfumfu njalo ilamalunga edlula amatshumi amahlanu njalo amanye amalunga ngasebenzela phandle kwelizwe le Zimbabwe.

Ukuze umuntu abe lilunga lalinhlanganiso kudingakala ukuba ahlawule amadola angamatshumi amathathu njalo umphathingcebo wenhlanganiso uDumisani Mhlanga ukhuthaze abalesifiso esokuba yingxenye yabo ukuba bengasabeli khatshana.

Unobhala wenhlanganiso ye Web of Love Trust uReuben Pembedza ugcizelele ukuba ukusebenzelana ndawonye kuzawaphathisa amalunga alinhlanganiso.

Linhlanganiso ihlanganisa bonke abenza ezemidlalo lamasiko kungakhathalekile ukuba umuntu ngumculi loba uyabaza kumbe uyacomba njalo inkokheli yayo ithi bamukelekile bonke abayizizalwane zase Zimbabwe ngoba kuqakathekile ukuba kubanjiswane ukuze impilo yabo ithuthuthuke.

Abanye abazinkokheli zenhlanganiso ye Web of Love ngabathi uBenson Ndlovu yena ongumsekeli kamgcinisihlalo, uTholakele Ndlovu ongumsekeli kanobhala, uV Mpala ongumsekeli kamphathingcebo, uOscar Siziba kanye lo Muchaneta Dube.

XS
SM
MD
LG