Unkosikazi ka msekeli kamongameli welizwe, uMnu. Constantino Chiwenga, uMarry Mubaiwa, osesehlukana lomyeni wakhe ubikwa etshaye owesifana ogcina abantwabakhe ohlangane laye esikolo seHellenic eBorrowdale eHarare, ezama ukufinyelela labo abantwana.
UNkosazana Delight Munyoro ubikwa esemangalele uNkosazana Mubaiwa emapholiseni, njalo isikhulumeli sawo uMnu. Paul Nyathi utshele iphephandaba leThe Herald ukuthi ngempela balwamukele loludaba njalo basaluphenya njalo abakamtholi uNkosazana Mubaiwa.
Kusenjalo, uMnu. Chiwenga usanda ukwethulela umkhokheli wezemithetho, uChief Justice Luke Malaba izikhalazo zakhe ngesinqumo esethulwa emthethwandaba we High Court ngodaba lokwehlukana kwakhe lomkakhe, uMarry.
Umahluli uMnu. Christopher Dube Banda wanquma ukuthi uMnu. Chiwenga abuyisele abantwana babo abathathu kumkakhe uMarry, amvumele ukuya emzini wabo owe Borrowdale njalo amuphe lezimota ezintathu.
Kodwa uMnu. Chiwenga uthi umkhokheli wabehluli, uMnu. George Chiweshe uyisihlobo somkakhe okungabe kubangela ukuthi amsekele ngesinqumo asethethwe ngumthethwandaba.
UMnu. Chiwenga wakhweza loludaba edale elimqoka ele supreme court. Akwaziwa ukuthi idale leli lizethula nini isinqumo salo.
Ukuhlaziya loludaba, sixoxa lengcwethi ecubungula ezombusazwe, uMnu. Rejoice Ngwenya ukuze sizwe imbono yakhe ngaloludaba.
