amalinks wokungena

Breaking News

Umbrella for Democratic Change: I-SADC Kayingenele Ixhazulule Ingxaki zeZimbabwe


SADC

Abomanyano wamabandla aphikisayo kweleBotswana, oweUmbrella for Democratic Change, sebeveze ukukhathazeka phezu kwesimo esiseZimbabwe, esigoqela ukubotshwa lokuhlukunyezwa kwabantu mahlayana, kanye lokungahlonitshwa kwelungelo loluntu.

Lokhu kwenzakala ngesikhathi uhulumende kamongameli Emmerson Mnangagwa esolwa kakhulu ngabenhlanganiso ezilwela amalungelo oluntu zaseZimbabwe lezakwamanye amazwe ikakhulu ngasemhlubulweni wangezansi yezwekazi leAfrica.

Isikhulumi seUDC, umnunzana Moeti Mohwasa uthi inhlanganiso yomanyano wamazwe asemhlubulweni ongezansi kwezwekazi leAfrica, oweSADC, sekumele ungenele ngesiphangi phangi edabeni lweZimbabwe.

Kodwa abanye abeZimbabwe bathi abaselathemba lokuthi inhlanganiso ezifana laboSADC, zingaxazulula ingxaki zeZimbabwe.

Umnunzana Taurai Mavhoko, unobhala jikelele wogatsha lwebandla leMDC Alliance kweleBotswana, uthi akukunengi abangakuthola kunhlanganiso yeSADC.

“NgeSADC, kuyakhathaza, kodwa akungimangalisi, ngoba yinto yabo yakudala. Ngitsho langesikhathi sikaMugabe babengakutshayi ndiva.”

Uthi okwenziwa ngabandla aphikisayo afana leUDC kanye le Economic Freedom Fighters (EFF) bayenza okubekakyo ngokuzama ukufaka umfutha kubo hulumende be SADC, ikakhulu uMongameli Cyril Ramaphosa ongumgcinisihlalo womanyano oweAfrican Union okwamanje ukuthi bethathe amanyathela.

Umnunzana Collen Mlalazi ohlala eGaborone, uthi laye kaboni inkokheli yeSADC ingathatha inyathela elicacayo ngesimo seZimbabwe.

“Lesi yiso isikhathi sokuthi inhlanganiso yeSADC isitshengisele ukuthi ilamazinyo, beyenze okunye, ikakhulu khathesi ngoba iZimbabwe kayilankhokheli. Sekukubi. Sekuyisikhathi sokuthi inhlanganiso ezifana leSADC iAU, leUN zisukume.”

Kusenjalo, ugatsha lweMDC Alliance eBotswana luthi luzaqhubeka ngohlelo lokutshengisela phezu kwesimo eZimbabwe.

AbeZimbabwe kweleBotswana bayehlulekile ukutshengisela kanye lezinye izizalwane ezikwamanye amazwe ngenxa yohlelo lokuzama ukwenqabela ukumemetheka komkhuhlane weCOVID-19, olwelockdown, olusanda kufakwa eGaborone.

Umnunzana Mavhoko uthi bazaqhubekela phambili ngokuqoqa ukutshengisela.

“Kulusizi ukuthi sangena kulockdown ngesikhathi sifuna ukutshengisela, umcabango yikuthi ingadlula ilockdown, sizayethula inkalazo zethu kuEmbassy.”

Inhlanganiso yeSADC yona izabamba umhlangano wayo wonhlangothi lwe SADC Organ Troika kusasa, kodwa udaba lweZimbabwe alukho kulehlelo kwendaba ezizakhulunywa.

Ngenxa yesimo seCOVID-19 umhlangano lo uzabanjwa ngemitshina yebulenjini, kungelakuhlangana kwenkokheli mathupha kuVirtual Conference.

please wait

No media source currently available

0:00 0:02:45 0:00

Facebook Forum

XS
SM
MD
LG