Umbukiso wezokwethekelelana oweSanganai/Hlanganani World Tourism Expo oqala ngoLwesine koBulawayo, egcekeni leZimbabwe International Trade Fair, ubikwa uzakwenzelwa kuleli dolobho okweminyaka emithathu elandelayo ngenjongo yokuvuselela amabhizimusi inengi elasalavalayo.
Lokhu kubikwe ngumqondisi wohlangothi lweZimbabwe Tourism Authority, uMnumzana Karikoga Kaseke, emhlanganweni lentathelizindaba koBulawayo.
UNkosikazi Faith Makamure, umnini weNtabeni Lodge, uthi uyajabula ngokuza kweHlanganani koBulawayo njalo isikhwama sokuboleka abakubhizimisi lezokwethekelelana sikaHulumende sihle kakhulu.
Siyathaba okumangalisayo ngokuzakweHlanganani koBulawayo kuzavuselela amabhizimusi ethu njalo siyabonga isamba semali esidalwe ngusibalukhulu webhanga leZimbabwe olokusibolekisa imali yokuthuthukisa indawo zethu njalo luza ngesikhathi esihle. Ngikhuthaza omama abangenelisanga ukuzobukisa amabhizimisi abo ukuba bathathe lelithuba njalo lonyaka thina omama ababukisa kuHlanganani asilamali esiyihlawulileyo kuyinjongo kaHulumende yokuthuthukisa omama.
Omunye njalo umninibhizimusi, uNkosikazi Sithandazile Moyo oweMeluleki Luv Safaris, uthi ujabule ngokuza kwe Hlanganani koBulawayo ethi bakhangelele ukuqhela kwebhizimusi lokwethekelana.
Siyabesibukisa lathi eSanganai/Hlanganani World Tourism Expo, njengebhizimusi esasungula sikhangelele ukukhula njalo sithole izethekeli ezinengi sifisa ukuba lobudlelwano lezethekeli zethu sibabukisa imvelo yakoBulawayo.
Umhleli weAmagugu International Heritage Centre eMatopo, uMnunzana Butholezwe Nyathi laye wamukele ngenjabulo lumbukiso koBulawayo.
Kuyasithokozisa njengabantu bakoBulawayo ukuba iSanganai/Hlanganani iphendukile koBulawayo lapho eyasungulwa khona. Indawo yethu ikhangela ezomdabu kodwa sisilele ukubayindawo ezavakatshelwa ngalesisikhathi ngakho sikhangelele ukuzithuthukisa ukuze kumiyaka ezayo lathi siphatheke.
Umsekelei KaMongameli, umnumzana Phelekezela Mphoko nguye okhangelelwe ukuvula okusemthethweni umbukiso weSanganai/Hlanganani World Tourism Expo walonyaka NgoLwesihlanu.
Nomanje kubenzima ukuba lombukiso lo lonyaka, inani labazebukisa likhuphukile lisuka kwabalikhulu lamatshumi amabili laya kumakhulu amabili lamatshumi amathathu lasithupha.
Abangamatshumi amathathu lanhlanu basuka emazweni alitshumi lanye, kukanti kumnyaka odlule abalitshumi lasifica munwe munye babesuka kwamanye amazwe.
Abathengi abanengi babikwa besuka eSouth Africa, abanye emhubulweni weMiddle East, Africa, Europe, China, Asia, Pacific leAmelika.
Umbukiso weSanganai/ Hlanganani uzakwenzelwa kuHall 3,4 2 lo2a njalo kukhangelelwe ukuba lemihlangano emithathu ejonge ukuthuthukisa ezokwethekelelana. EleSouth Africa yilo elilezethekeli eziza eZimbabwe ezinengi umakuqathaniswa lamanye amazwe njalo lamhlanje baphakathi kokukhulumisana lohulumende weZimbabwe ukuze ubudlelwano buyephambili.
ONozindaba abangamatshumi amathathu lantathu abaze ukuzoloba ngeSangana/Hlanganani abasuka kwamanye amazwe bagcinwa yi ZTA ngemizamo yokuba balobe kahle ngeZimbabwe ngoba kulilizwe elibikwa lilobudlwangudlwangu kusukela kuhlelo lukaHulumende olokwaba kutsha umhlabathi.
IZTA ithi umbukiso weCarnival uzabe ukhona kusukela mhlaka 14 Mpandula kusiya mhlaka 18 lonyaka.
