Akubizwa ozwayo limpelasonto yekhefu laseMelika ele Memorial Day lapho izizalwane zeZimbabwe ziyabe zibuthene emkhosini wombukiso lemidlalo yokuzilibazisa oweUSA ZimExpo owenzelwa esigabeni seCalifornia lonyaka.
Lumkhosi wesitshumi lanhlanu owe15th Annual ZimExpo ugoqela abamabhizimusi abazobukisa abakwenzayo, abaseMelika kanye labavela eZimbabwe.
NgoMgqibelo mhlaka 28 Nkwenkwezi kulapho okwenziwa imicimbicimbi yonke yokulibazisa uzulu ozabe ekhona ebalisa iFashion Show, abaculi abanye babo abavele eZimbabwe lomcintiswano omkhulu wokudinga intombazana enhle ukwedlula ezinye, isiqamulamayezi sikaMiss ZimUSA.
Omunye wabaqoqa lumkhosi wombukiso wezamabhizimusi lokuzilibazisa owe USA ZimExpo yalonyaka, uNkosazana Suku Ncube ohlala esigabeni seIndiana, eMelika, utshele iStudio Seven ukuthi lonyaka ubona lumkhosi uzaphumelela ukwedlula nyakenye ngoba kulokunye asebekwengezelele ikakhulu kezokulibazisa uzulu weZimbabwe osehlala eMelika laseCanada.
“Njengoba iCalifornia kuyindawo ethakazalelwa ngabanengi ngibona lumkhosi uzaphumelela okwamagama ngoba eminyakeni sivame ukuba lomdlalo wenguqu kuphela kodwa lonyaka sicabange ukuya eBeach ukuyadlala eminye imidlalo enjenge Beach Volleyball, iBeach Soccer, kuwoswa lokuphekwa ukudla kwaseZimbabwe”.
