amalinks wokungena

Breaking News

Kuvulwa Umbukiso Wezokuthengiselana oweZITF KoBulawayo


Umgcinisihlalo wombukiso lo uMnumzana Bekithemba Nkomo, uthi inani lamazwe abukisayo kanye lamankampani aze lawo likhuphukile lonyaka.

Umbukiso lo obanjwe ngaphansi kwendikimba ethi ‘Stimulating Trade, Seizing Opportunities to Accelerate Growth,’ ulababukisayo abanengi kulanyakenye ngokune ekhulwini- 4%.

Ekhuluma lentathelizindaba ngoLwesibili, umgcinisihlalo wombukiso lo uMnumzana Bekithemba Nkomo, uthi inani lamazwe abukisayo kanye lamankampani aze lawo akhwelile esukela kumatshumi amabili lasikhombisa – 27 nyakenye esiya ku matshumi amathathu lanye – 31 lonyaka.

Uthi ngenxa yemihlangano ekhona elizweni kuhulumende, babeke ilanga lokuvulwa okusemthethweni wombukiso ngoLwesine elivame ukuba ngoLwesihlanu okutsho ukuthi lonyaka amalanga abosomabhizimisi mabili kuphela.

Umbukiso lo ubuhlele ukuthi kuzakuba lomhlangano okhangela uhlangothi lwezethekeli, i-Incentive to Travel kodwa bacine bevumelana ukuthi ingcwethi evela eMelika uMnumzana Joost De Meyer akhulumisane lamankampani la nganye nganye.

Obekulo umhlangano lengcitshi le, uMnumzana Edward Soderling, uthi kuqakathekile ukuthi abantu abaza kumbukiso enje kanye lemihlangano batshelwe ngendawo ezikuleli zokwethekela ngoba yibo abalakho ukuphenduka lemuli zabo ukuza bona indawo ezitshiyeneyo elizweni.

Wengezelele wathi badinga ukwazi indlela ezehlukileyo zokukhuthaza izethekeli ukuza kuleli.

Omunye wababukisayo ovela eZansi Africa, nguNkosikazi Emily Mthunzi. Uthi manengi amathuba okwenza ibhizimisi kuleli awabonayo kunhlangothi ezitshiyeneyo.

Uthi ukuwa kwenotho yakuleli kutsho ukuthi manengi amathuba okusebenza lapho kuvuselelwa linotho okwenza ajabulele ukukhulumisana labosomabhizimisi abanengi ukuthi bangagezana njani izandla basebenze ndawonye.

Amazwe abukisa lonyaka agoqela iJapan eze lamankampani ambalwa, iChina, iPoland, iEthiopia kanye leIndia. ISouth Africa lanxa ikhona ayizanga lamankampani amanengi njengalokhu ebisivame ukukwenza kuminyaka edluleyo.

UMnu. Masimba Kuchera, ingcwethi ecubungula ezombusazwe utshele uSithandekile Mhlanga weStudio 7 ukuthi kufanele uhulumende aguqule eminye imithetho ephathelane lezomnotho ukwenzela ukuthi imbukiso enjengeZITF idale umahluko kwezomnotho welizwe.

please wait

No media source currently available

0:00 0:02:22 0:00
Lapho esitholakala khona

XS
SM
MD
LG