Umculi womdumo weRhumba osebenzela kweleSouth Africa kodwa edabuka eGohole, eMaphisa ezansi yeMaNdebeleni, u Fatty, usethule ingoma ayisebenzisa ukukhankasa ebantwini bendawo yakhe ukuthi basukume bathuthukise isikolo sabo, iGohole Primary.
Umkhankaso wentuthuko osungulwe ngumculi uFatty, ngoba ethi ufuna ukubona isikolo lesi afunda kuso sesingezinye sezibatshazwayo kweleMandebeleni.
“Bophijambo sakhe isikolo mzali wami. Yikho engikhuluma ngakho ukuthi njengomuntu okhulele lapha bengifisa ontanga labalandeli abanengi ngendlela abawuthanda ngakhona umculo wami uhambe indawo ezinengi uze ufinyelele kude. Engikujabulelayo yikuthi ingoma yami ethi bophijambo mzali wami banengi abayithanda kakhulu.”
Lesi sikolo sesibukeka kakhulu ngenxa yemikhankaso efana leka Fatty kanye lemizamo yalabo abafunda kulesi sikolo abazibiza Gohole Old Students Association.
Isakhamizi seGohole unkosazana Thubelihle Ndlovu ubonga uFatty ngecebo lale ingoma esithi isikhuthaze abanengi esigabeni ukuthi basukume balungiselele abantwana ikusasa engcono.
“Lengoma iyangithokozisa kakhulu kakhulu ukuthi uyatshengisa naye ukuthi isikolo sethu uyafuna ukuthi sithuthuke njalo sesisibona vele ukuthi sesithuthukile already isikolo sethu. Sesigcwele impompi yonki indawo sekungamanzi. Isikolo sethu sesisihle kakhulu. Sibonga sisithi nga uyaqhubekela phambili ngakho konke akwenzayo.”
Umnumnzana Joshua Moyo olilunga lekomiti ekhokhela isikolo lesi, uthi lobanje kukunengi asebexhaswe ngakho kulesi sikolo, kusasekunengi futhi okusasilela.
“Isikolo lesi siyashota ngezinto ezinengi. Aluba singazuza isamande sokwakha and lezindlu zamatitshala ziyashota. Nxa sithe sazuza esikuzuzileyo imali iphelela ekudleni bese kushota imali yeschool fees.”
UFatty uthi okunye okwenze wethula ingomale ukuze abambisane labanye abafundi abafunda kulesi sikolo yikuthi inengi labantwana abalazo izingwalo zokubala lokubhala kanti abanye abalawo lama yunifomu.
Lesi sikolo sifuna njalo indlu yezamacomputer lamacomputer, sifuna isiphala sezingwalo, umkulu wokuphekela ukudla kwabantwana, lezindlu zababalisi.
Okhokhela inhlanganiso yabafunda kulesi sikolo, asebesebenze gadalala kuntuthuko yaso, umnumnzana Mbekezeli Moyo, uthi bemukela yiloba yiluphi usizo umuntu alalo.
“So siyalicela bakithi abakwazi ukuthi bangasincedisa sicela lisincedise. Futhi siyajoyinisa khonapha abafuna ukuthi besincedise. Abafunda kusonalesi isikolo bayajoyina ijoining fee yokuba yimember of the association yi R50. Ngenyanga usukhipha uR20 nje kuphela ukuthi sizame ukuthuthukisa isikolo sethu.”
Isikolo lesi esakhiwe ngo 1954 silabantwana abedlula amakhulu amane.
