Umncintiswano wenguqu owokudinga intshantshu zomhlaba jikelele oweWorld Cup uyindaba esegudwini kulezinsuku kwele Zimbabwe okokuthi lamaqembu aphatheke kumncintiswano walonyaka owe Orap Zenzele Isuzu Champions Cup abebizwa ngamagama amazwe aphatheka kumidlalo lyezizwe zomhlaba eqhutshelwa kwele Russia kulezinsuku.
Bezibizwa ngamagama amaqembu aphatheke kumncintiswano wezizwe zomhlaba oqhutshelwa kwele Russia izikolo ezilitshumi lesithupha ezisuka kwelemaNdebeleni lase Nkabazwe ebezithe gwaqa esikolo seGifford esisedolobheni lakoBulawayo kumncintiswano walonyaka owe Orap Zenzele Isuzu Champions Cup.
Lumncintiswano osuleminyaka emihlanu wasungulwayo uqoqwa yinhlanganiso yeOrap isebenzisana labe Auto World njalo ungenwa yizikolo ezisemaphandleni.
Omunye wabadlali ophatheke kulumncintiswano uThabani Ngulube uthe lumncintiswano muhle ngoba usipha ithuba abantwana bemakhaya ukuba bebonwe ngamaqembu asemadolobheni.
“Leli bekulithuba elihle elokuthi njengoba sesibuye sazodlala lapha edolobheni mhlawumbe singabonwa ngamaqembu amakhulu.”
Iqembu lamantombazana ele Mzimuni High ebelibizwa ngegama elithiwa Mexico yilo elinqobe kucele labesifazane ngemva kokutshaya ele Manama ebelibizwa ngegama elithi England kufinal njalo yilo ebelivele liphethe isicoco ngemva kokunqoba lakumncintiswano wanyakenye.
Kucele labafana kunqobe iqembu le Tongwe High elase Beitbridge lona ebelibizwa ngegama elithi Spain ikanti nyakenye bekunqobe iqembu le Tsholotsho High.
Ezinye izikolo eziphatheke kumncintiswano walonyaka kucele labafana abaleminyaka engaphansi kwamatshumi amabili ngezibalisa eseGifford High, ebesibizwa ngegama elithi Egypt, ese Mabhikwa High, ebesibizwa ngegama elithi Brazil, ese Hlangano High ebesibizwa Argentina, ese Tsholotsho High ebesibizwa Morocco, ese Gloag High ebesibizwa Tunisia, ese Sibomvu High ebesibizwa ngegama elithi Portugal, kanye lese Manama High ebesibizwa ngegama elithi Russia.
Kucele lamankazana aleminyaka engaphansi kwamatshumi amabili amaqembu abebizwa ngokulandelayo; iqembu le Malungudzi High belibizwa France, ele Fatima High belibizwa Nigeria, ele Zwangendaba belibizwa Senegal, ele Manama belibizwa England, kuthi ele Pashu belibizwa Germany.