Inengi labakade besemhlanganweni omkhulu we Africa Travel Association eVictoria Falls ophele ngoLwesibili bathi umhlangano lo uphumelele okamagama loba nje ele Zimbabwe likhuthazwa ukuthi lilungise ezombusazwe ukwenzela ukuthi kukhangwe izethekeli zemazweni ezinengi.
Iziphathamandla zikahulumende zithi okwamanje sokumele ele Zimbabwe lithengisele elilakho okunjengezemvelo emazweni agoqela iMelika lawezwekazi leEurope.
Umnu. Walter Mzembi umphathintambo wezokwethekelelwa kwelizwe uthi abakade besemhlanganweni lo bathe okuyinkinga kakhulu kwele Zimbabwe yikuthi akulandizamtshina zemazweni eziletha izethekeli kwele Zimbabwe.
UMzembi uthe okunye njalo okuphume sobala emhlanganweni lo yikuthi kunzima ukuvula amabhizimusi ezemvelo kwele Zimbabwe.
Uphinde wathi uhulumende usevumelane le Wilderness Safaris ukuthi kuvuselelwe izindlu zamahotela eVictoria Falls kanye lendizamtshina yokuthwala izethekeli kuleyo ndawo.
Umnu. Siphambaniso Moyo omunye walabo akade besemhlanganweni lo uthe kumele ele Zimbabwe lisebenze gadalala ukuze konke okuvezwe emhlanganweni lo kulungiswe.
